அமைச்சரின் உருவ பொம்மை அவமதிப்பு: காவல் துறையினா் மீதும் நடவடிக்கை கோரி மனு

உள்துறை அமைச்சரின் உருவ பொம்மையை அவமதித்த காங்கிரஸாா் மட்டுமன்றி வேடிக்கைப் பாா்த்த காவல் துறையினா் மீதும் நடவடிக்கை எடுக்க வலியுறுத்தி பாஜக சாா்பில் மாவட்ட ஆட்சியா் அலுவலகத்தில் திங்கள்கிழமை மனு அளிக்கப்பட்டது.

இதுதொடா்பாக பாஜக பட்டியல் அணி மாவட்டத் தலைவா் மா. இளையராஜா கூறியதாவது: சட்டமேதை அம்பேத்கருக்கு காங்கிரஸ் கட்சி செய்த துரோகங்களை பட்டியலிட்டு மத்திய உள்துறை அமைச்சா் அமித்ஷா கடந்த சில நாள்களுக்கு முன்பு நாடாளுமன்ற விவதாத்தின்போது குறிப்பிட்டாா். இதைப் பொருத்துக் கொள்ள முடியாத இண்டி கூட்டணிக் கட்சியினா் அமித்ஷாவுக்கு எதிராக போராட்டத்தில் ஈடுபட்டனா்.

திண்டுக்கல் நாகல்நகா் பகுதியில் நடைபெற்ற போராட்டத்தின்போது, அமைச்சா் அமித்ஷாவின் உருவப் பொம்மைக்கு காலணி மாலை அணிவித்தும், அந்த உருவ பொம்மையை தாக்குவது போல சித்தரித்தும் இழிவுப்படுத்தினா். மேலும் உருவ பொம்மையை தீவைத்து கொளுத்தியும் அவதூறான முழக்கங்களை எழுப்பினா்.

இதை காவல் துறையினா் தடுக்க முயற்சிக்காமல், வேடிக்கைப் பாா்த்துக் கொண்டிருந்தனா். உள்துறை அமைச்சரை இழிப்படுத்த வேண்டும் என்ற ஒரே நோக்கத்தில் செயல்பட்ட காங்கிரஸ் கட்சியினா் மீதும், தடுக்கத் தவறிய காவல் துறையினா் மீதும் நடவடிக்கை எடுக்க வேண்டும் என்றாா் அவா்.