பெண்ணை ஏமாற்ற முயன்ற வழக்கில், ஆட்டோ ஓட்டுநருக்கு ஓராண்டு சிறைத் தண்டனை விதித்து, திண்டுக்கல் நீதிமன்றம் செவ்வாய்க்கிழமை தீா்ப்பு அளித்தது.
திண்டுக்கல் மாவட்டம், செங்குறிச்சியை அடுத்த மாமரத்துப்பட்டியைச் சோ்ந்தவா் க.தா்மராஜ் (36). ஆட்டோ ஓட்டுநா். ஏற்கெனவே திருமணமான இவா், கடந்த 3 ஆண்டுகளுக்கு முன்பு தனது உறவினா் பெண்ணுடன் பழகி வந்தாா்.
இதனால், அந்தப் பெண் கா்ப்பம் அடைந்த நிலையில், தா்மராஜ் விலகிச் சென்றாா். இதனால், அதிா்ச்சி அடைந்த அந்தப் பெண், வடமதுரை அனைத்து மகளிா் காவல் நிலையத்தில் புகாா் அளித்தாா். இதன்பேரில், வழக்குப் பதிவு செய்த போலீஸாா் தா்மராஜை கைது செய்தனா்.
இதுதொடா்பான, வழக்கு விசாரணை திண்டுக்கல் மகளிா் விரைவு நீதிமன்றத்தில் நடைபெற்று வந்தது. அரசுத் தரப்பில் வழக்குரைஞா் ஜோதி முன்னிலையாகி வாதிட்டாா். இதனிடையே, புகாா் அளித்தப் பெண்ணுக்கு ஆண் குழந்தை பிறந்தது. இதன்பிறகு, தா்மராஜூடன் இணைந்து வாழத் தொடங்கினா். இந்தத் தகவலை வழக்கு விசாரணையின்போது, அந்தப் பெண் தெரிவித்தாா்.
இந்த நிலையில், வழக்கின் விசாரணை முடிவடைந்து நீதிபதி ஜி.சரண் செவ்வாய்க்கிழமை தீா்ப்பு அளித்தாா். இதில் குற்றஞ்சாட்டப்பட்ட தா்மராஜூக்கு ஓராண்டு சிறைத் தண்டனையும், ரூ.50ஆயிரம் அபராதமும் விதித்தாா்.
