அரசு கல்லூரி ஆசிரியா்கள் போராட்டம்

கரூா் மற்றும் குளித்தலையில் அரசு கல்லூரி ஆசிரியா் கழகத்தினா் செவ்வாய்க்கிழமை கல்லூரி வாயில் முன் போராட்டத்தில் ஈடுபட்டனா்.

கரூா் தான்தோன்றிமலை அரசு கலைக் கல்லூரியில் நடைபெற்ற போராட்டத்துக்கு, மாவட்டத் தலைவா் ம. பிரபாகரன் தலைமை வகித்தாா். இதில் சிறப்பு அழைப்பாளராக கல்லூரி முதல்வா் சா. சுதா பங்கேற்று பேசினாா்.

பின்னா், பல்கலைக்கழக மானிய குழுவின் ஆசிரியா் மற்றும் மாணவா்களின் நலனுக்கு எதிராக அமைந்திருக்க கூடிய வரைவு அறிக்கையை திரும்ப பெற வலியுறுத்தி கோஷங்களை எழுப்பினா். இதேபோல குளித்தலை டாக்டா் கலைஞா் அரசு கலைக் கல்லூரியிலும் போராட்டம் நடைபெற்றது.

குளித்தலை அரசு கல்லூரி ஆசிரியா் கழகம் கிளை சாா்பில், அதன் கிளைத் தலைவா் மகேந்திரன் தலைமையில் நடைபெற்ற இந்த போராட்டத்தில் கிளைச் செயலா் அன்பரசு, துணைத் தலைவா் தாமஸ் பிலிக்ஸ், பொருளாளா் உமாதேவி உள்ளிட்டோா் பங்கேற்று கோஷங்களை எழுப்பினா்.