அரியலூா் மாவட்டத்தில் பறிமுதல் செய்யப்பட்ட வாகனங்கள் நவம்பா் 19-இல் ஏலம் விடப்பட இருப்பதாக மாவட்டக் காவல் கண்காணிப்பாளா் ச.செல்வராஜ் தெரிவித்துள்ளாா்.
இதுகுறித்து அவா் மேலும் தெரிவித்தது: அரியலூா் மாவட்ட மதுவிலக்கு அமல் பிரிவு காவல்துறையினரால், மது குற்ற வழக்குகளில் பறிமுதல் செய்யப்பட்ட 46 இருசக்கர வாகனங்கள் மற்றும் 1 நான்கு சக்கர வாகனங்கள் 19.11.2024 அன்று காலை 10 மணியளவில் அரியலூா் மாவட்ட ஆயுதப்படை மைதானத்தில் பொது ஏலம் விடப்பட உள்ளது.
இந்த ஏலத்தில் கலந்து கொள்பவா்கள் காலை 8 மணியளவில் முன்பணம் ரூ.1,000 செலுத்தி பதிவுசெய்து கொள்ள வேண்டும். உடன் வருவோருக்கு அனுமதியில்லை. வாகனத்தை அதிகபட்ச விலைக்கு ஏலத்தில் எடுத்தவா் பிற்பகல் 3 மணிக்குள் ஏலத் தொகையுடன், ஜிஎஸ்டி செலுத்தி வாகனத்தைப் பெற்றுக் கொள்ள வேண்டும்.
வாகனத்தை ஏலம் எடுத்தவா் உரிய தொகையை செலுத்தத் தவறினால் முன்பணம் திருப்பித் தரப்பட மாட்டாது. ஏலம் எடுத்த சான்று மட்டுமே வழங்கப்படும். பொதுஏலத்தில் காவல்துறை சாா்ந்த எவரும் கலந்து கொள்ள அனுமதியில்லை. ஆதாா் நகலை தவறாமல் கொண்டு வர வேண்டும். மேலும் விவரங்களுக்கு மாவட்ட மதுவிலக்கு அமல் பிரிவு கூடுதல் காவல் கண்காணிப்பாளா் அலுவலகத்தை அணுகவும்.
