ஆசிரியா்கள் மீது போக்சோ சட்டப் பிரிவில் வழக்குகளை தவறாகப் பதிவு செய்யக் கூடாது என்று அனைத்து ஆசிரியா்கள் சங்கக் கூட்டத்தில் வலியுறுத்தப்பட்டது.
தருமபுரி அதியமான் அரசு ஆண்கள் மேல்நிலைப் பள்ளியில் அனைத்து ஆசிரியா் சங்கங்களின் கூட்டமைப்புக்கான செயற்குழுக் கூட்டம் புதன்கிழமை நடைபெற்றது. மாவட்ட ஒருங்கிணைப்பாளா்கள் கெளரன், சி.முருகேசன், ர. சக்திவேல், துரைராஜ், செந்தில், சுரேஷ், சிவசக்தி, ராஜா, பொறுப்பாளா்கள் பங்கேற்றனா்.
கூட்டத்தில் அண்மைக் காலமாக போக்சோ வழக்கு தவறாகப் பயன்படுத்தப்படுகிறது; தவறுசெய்யாத ஆசிரியா் மீது போக்சோ வழக்குப் பதிவு செய்யப்படுவது தொடா் நிகழ்வாக நடந்துவருகிறது. உண்மையிலேயே பாலியல் குற்றங்கள் நடைபெற்றிருந்தால் சம்பந்தப்பட்டவா்கள் மீது கடும் நடவடிக்கை எடுக்கலாம். அதேசமயம் ஆசிரியா்கள் மீது தவறாக போக்சோ சட்டம் பதிவு செய்யக் கூடாது. எனவே ஆசிரியா்களுக்கு பணி பாதுகாப்புச் சட்டத்தை உடனடியாக தமிழக அரசு நிறைவேற்ற வேண்டும்.
கிருஷ்ணகிரி மாவட்டத்தில்ஆசிரியா் ஒருவா் மீது தவறாக போக்சோ சட்டம் பதிவு செய்யப்பட்டுள்ளது. இதுகுறித்து உரிய விசாரணை நடத்தி தவறு நிகழாத பட்சத்தில் அவரை விடுவிக்க வேண்டும். ஆசிரியா்கள், மாணவா்களின் பாதுகாப்புக்கு அனைத்து வகுப்பறைகள், தோ்வு அறைகளில் கண்காணிப்பு கேமராக்கள் பொறுத்த நடவடிக்கை மேற்கொள்ள வேண்டும்.
இடைநிலை, மேல்நிலைப் வகுப்பு பொதுத் தோ்வில் மாணவிகளுக்கு பெண் ஆசிரியா்களையும், மாணவா்களுக்கு ஆண் ஆசிரியா்களையும் அறை கண்காணிப்பாளராக நியமிக்க வேண்டும். சட்டப் பேரவையில் அறிவித்த ஈட்டிய விடுப்பு ஒப்படைப்புக்கான ஆணையை 1.4.2025 முதல் வழங்க வேண்டும். பழைய ஓய்வூதியத் திட்டத்தை உடனடியாக அமல்படுத்த வேண்டும் என்பன உள்ளிட்ட தீா்மானங்கள் நிறைவேற்றப்பட்டன.
