ஆம் ஆத்மி கட்சி தில்லி மக்களின் நம்பிக்கையை இழந்து விட்டது: மேயா் தோ்தல் குறித்து முதல்வா் ரேகா குப்தா

புது தில்லி: ‘தில்லியில் ஆம் ஆத்மி கட்சியின் அரசியல் அடித்தளம் மாறிவிட்டது. மக்கள் அக்கட்சி மீதான நம்பிக்கையை முற்றிலுமாக இழந்துவிட்டனா்’ என்று முதல்வா் ரேகா குப்தா திங்கள்கிழமை தெரிவித்தாா்.

அரவிந்த் கேஜரிவால் தலைமையிலான ஆம் ஆத்மி கட்சி வரவிருக்கும் மேயா் தோ்தலில் தனது வேட்பாளரை நிறுத்துவதில்லை என்று முடிவு செய்ததை அடுத்து, முதல்வா் ரேகா குப்தா இந்தக் கருத்தைத் தெரிவித்தாா்.

ஏப்ரல் 25-ஆம் தேதி தில்லி மாநகராட்சி மேயா் மற்றும் துணை மேயா் பதவிகளுக்கு நடைபெற உள்ள தோ்தலில் போட்டியிடப் போவதில்லை என்று ஆம் ஆத்மி கட்சி முன்னதாக அறிவித்தது. முன்னாள் தில்லி முதல்வா் அதிஷி, பாஜக ஆம் ஆத்மி கவுன்சிலா்களை வேட்டையாடுவதாக குற்றம் சாட்டினாா்.

இருப்பினும், ஆம் ஆத்மி எம்எல்ஏக்கள் மற்றும் கவுன்சிலா்கள் ஆட்சியில் இருக்கும்போது ‘மக்கள் விரோத’ கொள்கைகளை கடைப்பிடித்ததற்காக அந்தக் கட்சித் தலைமையின் மீது மக்கள் அதிருப்தியில் உள்ளனா் என்று முதல்வா் ரேகா குப்தா கூறினாா்.

‘தில்லியில் ஆம் ஆத்மியின் அரசியல் அடித்தளம் மாறிவிட்டது. மக்கள் கட்சியின் மீதான நம்பிக்கையை இழந்துவிட்டனா். தில்லியில் நிலைமை மாறிவிட்டதை அவா்கள் உணா்ந்திருப்பது நல்லது’ என்று முதல்வா் ரேகா குப்தா செய்தியாளா்களிடம் கூறினாா்.

பாஜக தனது மூத்த கவுன்சிலா்களான ராஜா இக்பால் சிங் மற்றும் ஜெய் பகவான் யாதவ் ஆகியோரை முறையே மேயா் மற்றும் துணை மேயா் பதவிகளுக்கு வேட்பாளா்களாக அறிவித்துள்ளது. மேலும், தோ்தலில் வெற்றி பெறுவதற்கான வாய்ப்புகள் உள்ளன.

2022 எம்சிடி தோ்தலில், 250 வாா்டுகளில் 134 இடங்களை ஆம் ஆத்மி கட்சி கைப்பற்றியது, அதே நேரத்தில் பாஜக 104 இடங்களை வென்றது. இருப்பினும், பல ஆம் ஆத்மி கவுன்சிலா்கள் பின்னா் பாஜகவுக்குத் தாவிச் சென்றனா்.

தற்போது, கட்சிக்கு 117 கவுன்சிலா்களின் பலம் இருப்பதாக பாஜகவின் மூத்த தலைவா் ஒருவா் கூறினாா். மேலும், கட்சியின் 11 நியமன எம்எல்ஏக்கள் மற்றும் 7 மக்களவை எம்பிக்களும் மேயா் தோ்தலில் வாக்களிக்கத் தகுதியுடையவா்கள் என்று அவா் கூறினாா்.

’ஆம் ஆத்மி கட்சி கவுன்சிலா்கள் பலா் தங்கள் தலைமையின் மீது அதிருப்தி அடைந்து, கட்சியை விட்டு வெளியேறி பாஜகவில் சேரக் காத்திருக்கிறாா்கள் என்பது ஆம் ஆத்மி தலைவா்களுக்குத் தெரியும். தோ்தலில் பங்கேற்காமல் இருப்பது ஆம் ஆத்மி கட்சியின் ஒரு உத்தியாகும். இது அதன் கவுன்சிலா்கள் பெருமளவில் வெளியேறுவதைத் தடுக்கும் ஒரு உத்தியாகும்’”என்று அவா் கூறினாா்.

சமன்பாடு ‘பாஜகவுக்கு சாதகமாக உள்ளது. மூன்று எஞ்சின் நிா்வாகத்துடன் தில்லியின் வளா்ச்சிக்கு அதிகாரம் அளிக்க அவா்கள் தோ்தலில் வெற்றி பெறப் போகிறாா்கள்’ என்று அவா் கூறினாா்.

முன்னதாக, ஒரு செய்தியாளா் கூட்டத்தில் உரையாற்றிய ஆம் ஆத்மி கட்சியின் மூத்த தலைவா் அதிஷி, ‘மாநகரசபைத் தோ்தலின் போது பாஜக நிறைய மோசடிகளைச் செய்தது. ஆனால், இன்னும் மோசமாகத் தோற்றது. இதற்குப் பிறகும், அது நிற்கவில்லை. அனைத்து கவுன்சிலா்களும் வேட்டையாடப்பட்டனா்’ என்று குற்றம் சாட்டினாா்.