மாஸ்கோ: அமெரிக்காவில் தயாரிக்கப்பட்ட அதிநவீன எஃப்-16 ரக விமானத்தை உக்ரைனின் ஸபோரிஷியா பகுதியில் சுட்டுவீழ்த்தியதாக ரஷியா கூறியுள்ளது.
இது குறித்து ரஷிய அதிகாரிகள் வெள்ளிக்கிழமை கூறியதாவது:
ஸபோரிஷியா பகுதியில் பறந்துகொண்டிருந்த எஃப்-16 விமானமொன்று ரஷியாவால் சுட்டுவீழ்த்தப்பட்டது. அந்தப் பகுதியிலுள்ள ரஷிய நிலை மீது தாக்குதல் நடத்த ஆயத்தமாகிக் கொண்டிருந்தபோது அந்த விமானம் அழிக்கப்பட்டது என்று அவா்கள் கூறினா்.
இந்தத் தகவல் உறுதி செய்யப்பட்டால், உக்ரைன் இழந்துள்ள இரண்டாவது எஃப்-16 போா் விமானம் இதுவாகும். முன்னதாக, ரஷியாவுக்கு எதிரான போரில் பயன்படுத்துவதற்காக உக்ரைனுக்கு மேற்கத்திய நாடுகள் வழங்கியுள்ள எஃப்-16 விமானங்களில் ஒன்று, கடந்த ஆகஸ்ட் மாதம் ரஷியா நடத்திய தீவிர ஏவுகணை மற்றும் ட்ரோன் தாக்குதலின்போது விழுந்து நொறுங்கியது. அதிலிருந்த விமானி உயிரிழந்தாா். அந்த விமானம் விழுந்து நொறுங்கியதற்கு ரஷிய ஏவுகணை காரணமில்லை என்று உக்ரைன் கூறியது.
ஆனால் இந்த முறை, உக்ரைனின் எஃப்-16 விமானத்தை தாங்களே சுட்டுவீழ்த்தியதாக ரஷிய அதிகாரிகள் தெரிவித்துள்ளது பரபரப்பை ஏற்படுத்தியுள்ளது.
..படவரி.. உக்ரைனுக்கு வழங்கப்பட்டுள்ள எஃப்-16 விமானம்.
