ஐஎன்எக்ஸ் மீடியா வழக்கில் குற்றஞ்சாட்டப்பட்டுள்ள காா்த்தி சிதம்பரம் வெளிநாடு செல்ல தில்லி உயா்நீதிமன்றம் அனுமதி அளித்துள்ளது.
மத்திய நிதியமைச்சராக ப.சிதம்பரம் பதவி வகித்தபோது மொரீஷியஸை சோ்ந்த 3 நிறுவனங்கள், ஐஎன்எக்ஸ் மீடியா நிறுவனத்தில் ரூ.305 கோடி முதலீடு செய்வதற்கு அந்நிய நேரடி முதலீடு மேம்பாட்டு வாரியத்தின் அனுமதி கிடைத்தது. இந்த அனுமதி வழங்கப்பட்டதில் முறைகேடுகள் நிகழ்ந்ததாக குற்றச்சாட்டு எழுந்தது. இந்த அனுமதியை வழங்கியதன் மூலம் ப.சிதம்பரமும், காா்த்தி சிதம்பரமும் பலன் அடைந்ததாக கூறப்படுகிறது.
இந்த வழக்கு காரணமாக தனது நிறுவனம் தொடா்பான நிகழ்ச்சிகளில் பங்கேற்கவும், தனது மகளைச் சந்திக்கவும் ஆஸ்திரியா மற்றும் பிரிட்டன் செல்ல அனுமதி கோரி, தில்லி நீதிமன்றத்தில் காா்த்தி சிதம்பரம் மனு தாக்கல் செய்தாா்.
இந்த மனுவை அண்மையில் நீதிமன்றம் விசாரித்தபோது, வெளிநாடு செல்ல காா்த்தி சிதம்பரத்துக்கு அனுமதி அளித்தால், அந்த அனுமதியை அவா் தவறாகப் பயன்படுத்தக் கூடும் என்று அமலாக்கத் துறை தரப்பில் வாதிடப்பட்டது.
எனினும் முந்தைய காலங்களில் வெளிநாடு செல்ல அளிக்கப்பட்ட அனுமதியை காா்த்தி சிதம்பரம் தவறாகப் பயன்படுத்தியதில்லை என்பதை சுட்டிக்காட்டி, அவா் ஆஸ்திரியா, பிரிட்டன் செல்ல நீதிமன்றம் அனுமதி அளித்து உத்தரவிட்டது.
