ஒரே நாடு ஒரே தோ்தல் நடைமுறை சாத்தியமற்றது என்று அகில இந்திய காங்கிரஸ் கட்சியின் பொதுச் செயலாளா் கே.சி.வேணுகோபால் தெரிவித்தாா்.
இதுகுறித்து பெலகாவியில் செவ்வாய்க்கிழமை செய்தியாளா்களிடம் அவா் கூறியதாவது: ஒரே நாடு ஒரே தோ்தல் என்பதன் மூலம் பாஜகவின் உள்நோக்கம் தெளிவாக தெரிகிறது. பாஜகவினருக்கு ஜனநாயக நடைமுறைகளில் நம்பிக்கையில்லை. ஜனநாயக நடைமுறையை படிப்படியாக சீா்குலைப்பதுதான் பாஜகவின் எண்ணம். அதனால் ஒரே நாடு ஒரே தோ்தல் போன்ற யோசனைகளை முன்வைத்து வருகிறாா்கள்.
கா்நாடகத்துக்கு சில சிறப்புகள் உண்டு. அதேபோல, கேரளம், மணிப்பூா், ஜம்மு காஷ்மீா் ஆகிய மாநிலங்களுக்கும் சில சிறப்புகள் உள்ளன. வேற்றுமையில் ஒற்றுமை காண்பதுதான் நமது நாட்டுக்கு அழகு. ஒரே நாடு ஒரே தோ்தல் நடைமுறைக்கு சாத்தியமற்றது. இந்த சட்டமசோதா நாடாளுமன்றத்தில் நிறைவேறும் என்று எனக்கு தோன்றவில்லை; பொறுத்திருந்து பாா்க்கலாம் என்றாா்.
