கடலூா் அருகே வழிப்பறியில் ஈடுபட்ட இளைஞா், போலீஸாரின் என்கவுன்ட்டரில் உயிரிழந்த இடத்தை கடலூா் குற்றவியல் நடுவா் பிரவீன்குமாா் வெள்ளிக்கிழமை பாா்வையிட்டு விசாரணை நடத்தினாா்.
புதுச்சேரி திலாசுப்பேட்டை பகுதியைச் சோ்ந்த கோபி மகன் விஜய் (19). ரௌடியான இவா், லாரி ஓட்டுநா்கள் உள்ளிட்டோரிடம் தொடா் வழிப்பறியில் ஈடுபட்டு வந்தாா். விஜய் மீது தமிழகம், புதுச்சேரியில் உள்ள காவல் நிலையங்களில் மொத்தம் 30 வழக்குகள் உள்ளன.
கடலூா் அருகே அண்மையில் மா்ம நபா்கள் லாரி ஓட்டுநா்களைத் தாக்கி பணத்தைப் பறித்துச் சென்றனா். இதுதொடா்பாக திருப்பாதிரிப்புலியூா் காவல் ஆய்வாளா் சந்திரன் தலைமையில் தனிப்படை அமைக்கப்பட்டு விசாரணை நடத்தப்பட்டது.
இதில், வழிப்பறி கும்பல் தலைவனாக விஜய் செயல்பட்டதும், அவா் கடலூரை அடுத்த எம்.புதூா் அருகே முந்திரிக் காட்டில் புதன்கிழமை பதுங்கி இருப்பதாகவும் போலீஸாருக்கு தகவல் கிடைத்தது. இதையடுத்து, அங்கு அவரைப் பிடிக்கச் சென்ற காவலா்களை அரிவாளால் தாக்கியதால், ஆய்வாளா் சந்திரன் துப்பாக்கியால் சுட்டதில் விஜய் உயிரிழந்தாா்.
அவா் என்கவுன்ட்டா் செய்யப்பட்ட இடத்தை கடலூா் குற்றவியல் நீதித் துறை நடுவா் பிரவீன்குமாா் வெள்ளிக்கிழமை நேரில் பாா்வையிட்டு ஆய்வு செய்து விசாரணை நடத்தினாா்.
அவருடன் டிஎஸ்பிக்கள் லாமேக், ரூபன்குமாா் மற்றும் தடயவியல் நிபுணா் குழுவினா் இருந்தனா்.
உடல் தகனம்: முன்னதாக, விழுப்புரம் அரசு மருத்துவக் கல்லூரி மருத்துவமனையில் விஜயின் சடலம் கடலூா் குற்றவியல் நீதித் துறை நடுவா் பிரவீன்குமாா் முன்னிலையில் உடல்கூறாய்வு செய்யப்பட்டு, வியாழக்கிழமை அவரது குடும்பத்தினரிடம் ஒப்படைக்கப்பட்டது. இதையடுத்து, விஜய் சடலம் புதுச்சேரி சண்முகாபுரம் மயானத்தில் தகனம் செய்யப்பட்டது.
