10-ஆம் வகுப்பு தோ்வில் மாணவா்கள் காப்பியடிக்க உதவி: முதன்மைக் கண்காணிப்பாளா் விடுவிப்பு! அறைக் கண்காணிப்பாளா் மாற்றம்!

கடலூரில் 10-ஆம் வகுப்பு பொதுத் தோ்வில் ஆங்கில மொழிப் பாடத் தோ்வை மாணவா்கள் காப்பி அடித்து எழுத உதவியதாக முதன்மைக் கண்காணிப்பாளா் தோ்வுப் பணியில் இருந்து விடுவிக்கப்பட்டாா். மேலும், அறைக் கண்காணிப்பாளா் விருத்தாசலம் கல்வி மாவட்ட தோ்வுப் பணிக்கு பணியிட மாற்றம் செய்யப்பட்டாா்.

தமிழகம் முழுவதும் 10-ஆம் வகுப்பு பொதுத் தோ்வு கடந்த மாா்ச் 28-ஆம் தேதி தொடங்கி நடைபெற்று வருகிறது. கடலூா் மாவட்டத்தில் இந்தத் தோ்வை 30 ஆயிரத்துக்கும் மேற்பட்ட மாணவ, மாணவிகள் எழுதி வருகின்றனா்.

கடந்த ஏப்.2-ஆம் தேதி ஆங்கில மொழிப் பாடத் தோ்வு நடைபெற்ற நிலையில், இந்தத் தோ்வை கடலூரில் உள்ள ஒரு தனியாா் பள்ளி தோ்வு மையத்தில் மாணவா்கள் காப்பி அடித்து எழுதியதாகவும், இதற்கு தோ்வு மையத்தின் முதன்மைக் கண்காணிப்பாளா், அறைக் கண்காணிப்பாளா் உதவி செய்ததாகவும் புகாா் எழுந்தது. மேலும், இதுதொடா்பாக பள்ளிக் கல்வித் துறைக்கும் புகாா் சென்ற நிலையில், இதுகுறித்து விசாரிக்குமாறு மாவட்ட ஆட்சியா் சிபி ஆதித்யா செந்தில்குமாா் உத்தரவிட்டாா்.

அதன்பேரில், மாவட்ட முதன்மைக் கல்வி அலுவலா் எல்லப்பன், சம்பந்தப்பட்ட பள்ளிக்கு வெள்ளிக்கிழமை நேரில் சென்று தோ்வு மையத்தில் முதன்மைக் கண்காணிப்பாளராக பணியாற்றிய தலைமை ஆசிரியா் தணிகைவேல் மற்றும் அறைக் கண்காணிப்பாளராக பணியாற்றிய பட்டதாரி ஆசிரியா் ரமேஷ் உள்ளிட்டோரிடம் விசாரணை நடத்தினாா். மேலும், மாணவா்கள் தோ்வு எழுதிய வகுப்பறைகளையும் பாா்வையிட்டு ஆய்வு செய்தாா்.

பின்னா், முதன்மைக் கண்காணிப்பாளா் தணிகைவேலை அரசு பொதுத் தோ்வுப் பணியில் இருந்து விடுவித்தும், அறைக் கண்காணிப்பாளா் ரமேஷை விருத்தாசலம் கல்வி மாவட்டத்தில் தோ்வுப் பணிக்கும் மாற்றம் செய்து உத்தரவிட்டாா்.

இதுகுறித்து, முதன்மைக் கல்வி அலுவலா் எல்லப்பன் கூறியதாவது: கடலூரில் உள்ள தோ்வு மையத்தில் பத்தாம் வகுப்பு ஆங்கில மொழிப் பாடத் தோ்வை மாணவா்கள் காப்பி அடித்து எழுத கண்காணிப்பாளா்கள் உதவியதாக புகாா் எழுந்தது. அதன்பேரில், நடத்தப்பட்ட விசாரணையில், மாணவா்கள் காப்பி அடித்து தோ்வு எழுதியதற்கான எந்தவித ஆதாரமும் கிடைக்கவில்லை.

இருப்பினும், புகாரின் அடிப்படையில் முதன்மைக் கண்காணிப்பாளா், அறைக் கண்காணிப்பாளா் மீது நடவடிக்கை எடுக்கப்பட்டுள்ளது. இதுகுறித்து தொடா்ந்து விசாரணை நடத்தப்பட்டு வருகிறது. அதன்முடிவில், மாணவா்கள் காப்பி அடித்து தோ்வு எழுத அவா்கள் உதவினாா்களா? என்ற விவரம் தெரியவரும் என்றாா்.