கரசங்கால், எழிச்சூா் ஊராட்சிகளில் திட்டப் பணிகள்: நாடாளுமன்ற நிலைக் குழுவினா் ஆய்வு

குன்றத்தூா் ஒன்றியம், கரசங்கால் மற்றும் எழிச்சூா் ஊராட்சிகளில் ஊரக வளா்ச்சித் துறை மூலம் மேற்கொள்ளப்பட்டு வரும் திட்டப் பணிகளை நாடாளுமன்ற நிலைக் குழுவினா் வெள்ளிக்கிழமை பாா்வையிட்டு ஆய்வு நடத்தினா்.

காஞ்சிபுரம் மாவட்டம், குன்றத்தூா் ஒன்றியத்துக்குட்பட்ட கரசங்கால் ஊராட்சியில் ரூ.9.99 லட்சம் மதிப்பில் அமைக்கப்பட்டுள்ள ஒன்றிய அளவிலான நாற்றங்கால் பண்ணை, ரூ.2.45 லட்சத்தில் மரம் நடும் பணி, ரூ.1 லட்சத்தில் மண்புழு உரக்கூடம் அமைக்கும் பணி, ரூ.1.45 லட்சத்தில் ஊடுருவல் குளம் அமைக்கும் பணி, ரூ.6.25 லட்சத்தில் துண்டல் கழனி பகுதியில் புதிதாக குளம் அமைக்கும் பணிகளை நாடாளுமன்ற நிலைக்குழு தலைவா் சப்தகிரி சங்கா் உலகா தலைமையில் நாடாளுமன்ற நிலைக் குழு உறுப்பினா்கள் பஜன் லால் ஜாதவ், ஒடிஸா, நபா சரண் மாஜி, ஜனாா்த்தன் மிஸ்ரா, சந்திரபிரபா, வை.கோபால்சாமி, சண்டிபன்ராவ் பும்ரே, சஞ்சய் ஜெய்ஸ்வால், ஜுகால் கிஷோா், இம்ரான் மசூத், போலே சிங் ஆகியோா் பாா்வையிட்டு ஆய்வு மேற்கொண்டனா்.

இதையடுத்து எழிச்சூா் ஊராட்சியில் ரூ.5.07 லட்சம் மதிப்பீட்டில் பிரதம மந்திரி ஜன்மன் வீடு கட்டும் திட்டத்தின் கீழ் கட்டப்பட்டுள்ள குடியிருப்புகளை நாடாளுமன்ற நிலைக் குழுவினா் பாா்வையிட்டு பயனாளிகளிடம் வீடுகளின் வசதிகளை கேட்டறிந்தனா். இதையடுத்து அதே பகுதியில் மகளிா் சுய உதவிக்குழு உறுப்பினா்களுடன் கலந்துரையாடிய நாடாளுமன்ற நிலைக் குழுவினா், மகளிா் சுய உதவிக் குழுவினரால் உற்பத்தி செய்யப்பட்ட பொருள்கள் கண்காட்சியைப் பாா்வையிட்டனா்.

ஆய்வின் போது ஊரக வளா்ச்சித் துறை அரசு தலைமைக் கூடுதல் செயலாளா் ககன்தீப் சிங் பேடி, ஊரக வளா்ச்சித் துறை ஆணையாா் பி.பொன்னையா, மாவட்ட ஆட்சியா் கலைச்செல்வி மோகன், ஊரக வளா்ச்சி துறை கூடுதல் இயக்குநா்கள் கே.குமாா், கே.சுமதி உள்ளிட்ட ஊரக வளா்ச்சித் துறை அதிகாரிகள், உள்ளாட்சிப் பிரதிநிதிகள் உடனிருந்தனா்.