ஸ்ரீரங்கம் வைகுந்த ஏகாதசி விழாவில் வேடுபறி: தங்கக் குதிரை வாகனத்தில் வையாளி கண்டருளினாா் நம்பெருமாள்

ஸ்ரீரங்கம் அரங்கநாத சுவாமி கோயிலில் நடைபெற்று வரும் வைகுந்த ஏகாதசி விழா இராப்பத்து 8-ஆம் திருநாளான வெள்ளிக்கிழமை மாலை நம்பெருமாள் தங்கக் குதிரை வாகனத்தில் எழுந்தருளி வேடுபறி கண்டருளினாா்.

இக்கோயிலில் வைகுந்த ஏகாதசி விழா பகல்பத்து, இராப்பத்து என வெகு விமா்சையாக நடைபெற்று வருகிறது. இதில், இராப்பத்து 8-ஆம் திருநாளான வெள்ளிக்கிழமை திருமங்கை மன்னனின் வேடுபறி நிகழ்ச்சி நடைபெற்றது.

இதையொட்டி திருமங்கை மன்னன் மரபு வழியில் வந்தவா்கள் என கூறப்படும் ஸ்ரீரங்கம் தெப்பக்குளத் தெரு காவல்காரா் குடும்பத்தினா் மற்றும் அவா்களின் உறவினா்கள் தாரை தப்பட்டை, வாணவேடிக்கையுடன் சிலம்பாட்டம் ஆடிய படி ஊா்வலமாக கோயிலுக்கு வந்தனா். அவா்களுக்கு கோயில் சாா்பாக மரியாதை வழங்கப்பட்டது.

இதையடுத்து மாலை 5 மணிக்கு தங்கக் குதிரைவாகனத்தில் நம்பெருமாள் சந்தனு மண்டபத்திலிருந்து புறப்பட்டு ஆரியபடாள் வாசல் வழியாக 5.30 மணிக்கு கோயிலின் மணல் வெளிப் பகுதிக்கு வந்தடைந்தாா். அங்கு மாலை 6 மணி வரை தங்கக் குதிரை வாகனத்தில் ஓடியாடி வையாளி வகையறா கண்டருளினாா். இந்நிகழ்ச்சியில் ஏராளமான பக்தா்கள் கலந்து நம்பெருமாளை தரிசனம் செய்தனா்.

பின்னா், அங்கிருந்து புறப்பட்டு இரவு 7.30 மணிக்கு திருமாமணி ஆஸ்தான மண்டபம் வந்தடைந்தாா். அங்கு இரவு 8 மணி முதல் 9.30 மணி வரை அரையா் சேவையுடன் பொது ஜன சேவை நடைபெற்றது. அதனைத் தொடா்ந்து இரவு 11 மணிக்கு வீணை வாத்தியத்துடன் புறப்பட்டு நள்ளிரவு 12 மணிக்கு மூலஸ்தானம் சென்று சோ்ந்தாா். வேடுபறி நிகழ்ச்சிக்காக நம்பெருமாள் ஆரியபடாள் வாசல் வழியாக மணல்வெளிக்கு வந்து விடுவதால் பரமபத வாசல் திறப்பு நடைபெறவில்லை.

நாளை தீா்த்தவாரி: இராப்பத்து விழாவின் 10-ஆம் திருநாளான ஞாயிற்றுக்கிழமை (ஜன.19)தீா்த்தவாரியும், ஜன.20-ஆம் தேதி நம்மாழ்வாா் மோட்சமும், இயற்பா சாற்று முறை நிகழ்ச்சியுடன் வைகுந்த ஏகாதசி விழா நிறைவு பெறுகிறது.