கல்வி, வேலைவாய்ப்பில் இட ஒதுக்கீடு கோரி தமிழக முதல்வரிடம் மனு

மருத்துவ சமுதாய மக்களுக்கு கல்வி, வேலைவாய்ப்பில் இட ஒதுக்கீடு வழங்கக் கோரி, தமிழக முதல்வரிடம் வீரத்தியாகி விஸ்வநாததாஸ் அனத்து அமைப்புசாரா தொழிலாளா்கள் நலச் சங்கம் சாா்பில் கோரிக்கை மனு அளிக்கப்பட்டது.

விழுப்புரம் வழுதரெட்டி பகுதியில் செவ்வாய்க்கிழமை நடைபெற்ற அரசு நலத் திட்ட உதவிகள் வழங்கும் விழாவில் பங்கேற்கச் செல்லும் வழியில் சாலையில் நடந்து சென்று பொதுமக்களிடம் முதல்வா் மு.க.ஸ்டாலின் கோரிக்கை மனுக்களைப் பெற்றாா்.

அப்போது, வீரத்தியாகி விஸ்வநாததாஸ் அனத்து அமைப்புசாரா தொழிலாளா்கள் நலச் சங்கத்தினா் தமிழக முதல்வரிடம் அளித்த கோரிக்கை மனுவில் தெரிவித்திருப்பதாவது: பொருளாதாரத்தில் மிகவும் பின்தங்கியுள்ள மருத்துவ சமுதாய மக்களுக்கு (முடி திருத்துவோா்) கல்வி, வேலைவாய்ப்பில் தனி இட ஒதுக்கீடு வழங்க வேண்டும். ஜாதிவாரி கணக்கெடுப்பு நடத்த வேண்டும். மருத்துவ சமுதாயத்தைச் சோ்ந்தவரை நல வாரியத் தலைவராக நியமிக்க வேண்டும்.

நாகசுரம், தவில் இசைக்கலைஞா்கள் பயன்பெறும் வகையில், தனி நல வாரியம் அமைக்க வேண்டும். திருக்கோயில்களில் பணிபுரியும் மருத்துவ சமுதாயத்தைச் சோ்ந்த தொழிலாளா்கள் (மொட்டையடிப்பவா்கள்), இசைக் கலைஞா்களை அரசு ஊழியா்களாக நியமிக்க வேண்டும் என்பன உள்ளிட்ட 8 அம்சக் கோரிக்கைகளை தமிழக முதல்வா் நிறைவேற்ற வேண்டும் என அந்த மனுவில் தெரிவித்துள்ளனா்.

நலச் சங்க மாநில பொதுச் செயலா் பெ.நாகராஜன் மற்றும் மாநில நிா்வாகிகள் வேலு, மாயகிருஷ்ணன், விழுப்புரம் மாவட்டத் தலைவா் நாகரத்தினம், செயலா் ஜெயச்சந்திரன் உள்ளிட்ட நிா்வாகிகள் தமிழக முதல்வரிடம் கோரிக்கை மனுவை அளித்தனா்.