களியக்காவிளை பேருந்து நிலையப் பணி: ஆட்சியா் ஆய்வு

களியக்காவிளை பேருந்து நிலைய கட்டுமானப் பணிகளை மாவட்ட ஆட்சியா் ரா. அழகுமீனா பாா்வையிட்டு ஆய்வு செய்தாா்.

களியக்காவிளை, இடைக்கோடு பேரூராட்சி மற்றும் வன்னியூா் ஊராட்சிப் பகுதியில் நடைபெறும் வளா்ச்சி திட்டப் பணிகளை மாவட்ட ஆட்சியா் ரா. அழகுமீனா புதன்கிழமை பாா்வையிட்டு ஆய்வு செய்தாா்.

பின்னா் செய்தியாளா்களிடம் அவா் தெரிவித்ததாவது:

விளவங்கோடு வட்டம், இடைக்கோடு மேம்படுத்தப்பட்ட அரசு ஆரம்ப சுகாதார நிலையத்தில் உள்நோயாளி பிரிவு, வெளிநோயாளி பிரிவு, மருந்தகம், ஆய்வகம் உள்ளிட்ட பிரிவுகள் ஆய்வு மேற்கொள்ளப்பட்டது. உள்நோயாளிகள் பிரிவில் மேல்தளத்தில் ரூ. 60 லட்சத்தில் புதிய கட்டடம் கட்ட துறைசாா்ந்த அலுவலா்களுக்கு அறிவுறுத்தப்பட்டது. தொடா்ந்து மேல்புறம் ஊராட்சி ஒன்றியத்துக்கு உள்பட்ட வன்னியூா் ஊராட்சியில் பிரதமரின் கிராம சதக் யோஜனா 2023 - 2024 திட்டத்தின் கீழ் ரூ. 1.56 கோடியில் பரக்குன்று - சாணி - தோட்டச்சாணி - செழுவன்சேரி வடசேரிக்காலை வரையிலான 3 கி.மீட்டா் தூரம் கருந்தளம் அமைக்கப்பட்ட பணிகளை பாா்வையிட்டு ஆய்வு செய்யப்பட்டது.

இதைத் தொடா்ந்து களியக்காவிளையில் 4,063.29 சதுர மீட்டரில், கலைஞா் நகா்புற மேம்பாட்டு திட்டத்தின் கீழ் ரூ. 9.20 கோடியில் நடைபெற்று வரும் பேருந்து நிலையப் பணியை பாா்வையிட்டு ஆய்வு செய்ததுடன், இப் பணிகளை விரைந்து முடிக்க அலுவலா்களுக்கு அறிவுறுத்தப்பட்டது.

ஆய்வின்போது, மேல்புறம் ஊராட்சி ஒன்றிய பொறியாளா் அஜிதகுமாரி, வட்டார வளா்ச்சி அலுவலா்கள் சுப்பிரமணியம், சுரேஷ்குமாா், களியக்காவிளை பேரூராட்சித் தலைவா் ஆ. சுரேஷ் உள்பட வாா்டு உறுப்பினா்கள் கலந்து கொண்டனா்.