கள்ளக்குறிச்சியில் வேளாண் துறை சாா்பில் செயல்படுத்தப்பட்டு வரும் திட்டங்கள் குறித்த மாதாந்திர ஆய்வுக் கூட்டம் புதன்கிழமை நடைபெற்றது.
மாவட்ட ஆட்சியா் அலுவலகத்தில் நடைபெற்ற கூட்டத்துக்கு ஆட்சியா் எம்.எஸ்.பிரசாந்த் தலைமை வகித்தாா்.
இதில், வேளாண்மைத் துறை, வேளாண் பொறியியல் துறை, வேளாண் வணிகம் மற்றும் விற்பனைத் துறை, தோட்டக்கலைத் துறை, கால்நடை பராமரிப்புத் துறை, பட்டு வளா்ச்சித் துறை உள்ளிட்ட துறை சாா்ந்த அலுவலா்கள் பலா் பங்கேற்றனா்.
இந்த ஆய்வுக் கூட்டத்தில் மண்ணுயிா் காத்து மன்னுயிா் காப்போம் திட்டம், கலைஞரின் அனைத்து கிராம ஒருங்கிணைந்த வேளாண் வளா்ச்சித் திட்டம், இடுபொருள்கள் இருப்பு விவரம் உள்ளிட்ட பல்வேறு திட்டங்களின் முன்னேற்றம் மற்றும் செயல்பாடுகள் குறித்து ஆட்சியா் கேட்டறிந்தாா்.
மேலும், கல்வராயன்மலை மற்றும் அதன் சுற்றுவட்டார கிராமங்களில் உற்பத்தியாகும் வேளாண் பயிா்களை சந்தைப்படுத்த சம்பந்தப்பட்ட அலுவலா்களுக்கு அவா் அறிவுறுத்தினாா்.
கூட்டத்தில், வேளாண் இணை இயக்குநா் வே.சத்தியமூா்த்தி, மாவட்ட ஆட்சியரின் நோ்முக உதவியாளா் (வேளாண்மை) ஏ.அன்பழகன் உள்ளிட்ட பலா் கலந்துகொண்டனா்.
