ஆரணி/வந்தவாசி/போளூா் : காணும் பொங்கலையொட்டி, திருவண்ணாமலை மாவட்டத்தில் உள்ள பல்வேறு கோயில்களில் வியாழக்கிழமை சிறப்பு வழிபாடு நடைபெற்றது.
ஆரணி:
ஆரணி புதுக்காமூா் ஸ்ரீபெரிய நாயகி சமேத புத்திரகாமேட்டீஸ்வரா் காணும் பொங்கலையொட்டி ஆற்றுப்படி திருவிழா நடைபெற்றது.
இதில், சுவாமிக்கு சிறப்பு அபிஷேகங்கள் நடைபெற்று, மகா அலங்காரம் செய்து தீபாராதனை காண்பிக்கப்பட்டது.
விழாவில் சுற்று வட்டாரப் பகுதிகளில் இருந்து திரளாக பக்தா்கள் கலந்து கொண்டு சுவாமி தரிசனம் செய்தனா்.
மேலும், கோயிலை சுற்றிலும் சிறுவா்கள் முதல் பெரியவா்கள் வரை பொழுது போக்கு அம்சங்கள் நிறைந்து இருந்தன. தொகுதி எம்எல்ஏ சேவூா் எஸ். ராமச்சந்திரன், அதிமுக நிா்வாகிகள் பலா் கலந்து கொண்டனா். விழாவுக்கான ஏற்பாடுகளை கோயில் செயல் அலுவலா் ஹரிகரன் மற்றும் நிா்வாகிகள் செய்திருந்தனா்.
சேவூரில்...
ஆரணியை அடுத்த சேவூா் கிராமத்தில் அமைந்துள்ள திரௌபதி அம்மன் சமேத ஸ்ரீதருமராஜா கோயிலில் சுவாமிக்கு சிறப்பு அபிஷேக, ஆராதனை நடைபெற்றது.
பின்னா், சுவாமி புஷ்ப அலங்காரத்தில் பக்தா்களுக்கு காட்சியளித்தாா்.
இதைத் தொடா்ந்து, சுவாமி வாணவேடிக்கையுடன் திருவீதி உலா நடைபெற்றது. சென்றது. இதில், சேவூா் எஸ்.ராமச்சந்திரன் கலந்து கொண்டு வழிபட்டாா்.
வந்தவாசி:
வந்தவாசியை அடுத்த பாதிரி கிராமத்தில் உள்ள
ஸ்ரீலஷ்மி நாராயண பெருமாள் கோயிலில் காணும் பொங்கலையொட்டி சுவாமிக்கு சிறப்பு அபிஷேகம் பூஜைகள் நடைபெற்றன. சுவாமி சிறப்பு அலங்காரத்தில் பக்தா்களுக்கு அருள்பாலித்தாா்.
போளூா்:
சேத்துப்பட்டை அடுத்த விளாப்பாக்கம் ஊராட்சியைச் சோ்ந்த சோத்துகன்னி கிராமத்தில் அமைந்துள்ள
ஸ்ரீமுத்தாலம்மன், ஸ்ரீமாரியம்மன் கோயிலில் பக்தா்கள் பொங்கல் வைத்து சுவாமிக்கு படையலிட்டு வழிபட்டனா்.
மிகவும் பழைமை வாய்ந்த ஸ்ரீமுத்தாலம்மன், ஸ்ரீமாரியம்மன் கோயிலில் காணும் பொங்கலையொட்டி, வியாழக்கிழமை அதிகாலை மூலவா் சுவாமிகளுக்கு சிறப்பு அபிஷேக, ஆராதனைகள் நடைபெற்றன. பின்னா், மலா்களால் அலங்காரம் செய்து தீபாராதனை காண்பிக்கப்பட்டது.
இதைத் தொடா்ந்து, உற்சவா்கள் சிறப்பு அலங்காரத்தில் பாா்வதி சமேத ஈஸ்வரனுடன் கோயில் வளாகத்தில் எழுந்தருளி பக்தா்களுக்கு அருள்பாலித்தனா்.
விழாவில் விளப்பாக்கம், சோத்துகன்னி, கொழாவூா், பெரணம்பாக்கம், அல்லியாளமங்கலம், செம்மியமங்கலம், மொடையூா், ஊத்தூா், நரசிங்கபுரம், தேவிகாபுரம், போளூா், ஆத்துரை, சித்தாத்துரை என சுற்றுப்புறக் கிராமங்களில் இருந்து திரளான பக்தா்கள் கலந்து கொண்டு வழிபட்டனா்.
மேலும், நோ்த்திக்கடனாக பக்தா்கள் அங்கபிரதட்சணம், முடிக்கை காணிக்கை செலுத்துதல் போன்றவற்றை மேற்கொண்டனா். கண்மலா் வைத்தும் தரிசனம் செய்தனா். இரவில் இன்னிசை நிகழ்ச்சி, தெய்வீக நாடகம், வாணவேடிக்கை என பல்வேறு நிகழ்ச்சிகளுக்கு விழாக்குழுவினா் ஏற்பாடு செய்திருந்தனா். மேலும், விவசாயிகள் தங்களது மாடுகளுடன் வந்து கோயிலைச் சுற்றி வழிபட்டனா்.
