சின்னப்பள்ளிக்குப்பம் மனுநீதிநாள் முகாமில் ரூ. 72 லட்சத்தில் நலத் திட்ட உதவி

சின்னப்பள்ளிகுப்பம் ஊராட்சியில் நடைபெற்ற மனுநீதி நாள் முகாமில் 152 பயனாளிகளுக்கு ரூ. 72 லட்சத்து ஆயிரத்து 525 மதிப்பிலான நலத் திட்ட உதவிகளை வேலூா் மாவட்ட ஆட்சியா் வழங்கினாா்.

வேலூா் மாவட்டம், அணைக்கட்டு வட்டம், சின்னப்பள்ளிகுப்பம் ஊராட்சியில் மனுநீதி நாள் புதன்கிழமை நடைபெற்றது. மாவட்ட ஆட்சியா் வி.ஆா்.சுப்புலட்சுமி தலைமை வகித்தாா். இதில், ஏற்கெனவே பெறப்பட்ட 389 மனுக்களில் 152 மனுக்கள் ஏற்கப்பட்டு, பயனாளிகளுக்கு ரூ. 72 லட்சத்து ஆயிரத்து 525 மதிப்பிலான நலத் திட்ட உதவிகள் வழங்கப்பட்டன.

மேலும், 181 மனுக்கள் பரிசீலனையில் உள்ளதாகவும், 56 மனுக்கள் தள்ளுபடி செய்யப்பட்டதாகவும், புதன்கிழமை நடைபெற்ற மனுநீதி நாள் முகாமில் புதிதாக 49 கோரிக்கை மனுக்கள் பெறப்பட்டிருப்பதாகவும் தெரிவிக்கப்பட்டது.

முன்னதாக, மனுநீதி நாள் முகாமில் பல்வேறு அரசுத் துறைகளின் சாா்பில் அமைக்கப்பட்டிருந்த கண்காட்சி அரங்குகளை ஆட்சியா் பாா்வையிட்டாா்.

முகாமில், ஆம்பூா் சட்டப்பேரவை உறுப்பினா் அ.செ.வில்வநாதன், மாவட்ட ஊராட்சிக் குழுத் தலைவா் மு.பாபு, ஊரக வளா்ச்சி முகமைத் திட்ட இயக்குநா் நீ.செந்தில்குமரன், வேளாண்மை இணை இயக்குநா் ஸ்டீபன் ஜெயக்குமாா், வேலூா் வருவாய் கோட்டாட்சியா் விஷ்ணுபிரியா உள்ளிட்டோா் பங்கேற்றனா்.