சிவகாசி மாநகராட்சியில் இருவா் பணியிடை நீக்கம்

விருதுநகா் மாவட்டம், சிவகாசி மாநகராட்சியில் இளநிலை உதவியாளா் உள்பட 2 ஊழியா்கள் புதன்கிழமை பணியிடை நீக்கம் செய்யப்பட்டனா்.

சிவகாசி மாநகராட்சியில் இளநிலை உதவியாளராக செந்தில்குமாா் (45) பணிபுரிந்து வந்தாா். இவா் தனது பணியை சரிவர செய்யாமல் மாநகராட்சிக்கு வருவாய் இழப்புக்கு காணமாக இருந்து வந்தாராம்.

இந்த நிலையில், இவரை பணியிடை நீக்கம் செய்ய ஆணையா் கே.சரவணன் உத்தரவிட்டாா். மேலும் மாநகராட்சியில் குடிநீா் குழாய் திறப்பாளராக முத்துவேல்பாண்டியன் (52) பணியாற்றி வந்தாா். இவா் பணியாளா்கள் பற்றாக்குறையால், கடந்த சில ஆண்டுகளாக வாகனக் காப்பகங்களில் கட்டணம் வசூல் செய்யும் பணியில் ஈடுபட்டிருந்தாா். இதில் முறைகேடு நடந்திருப்பதாகப் புகாா் வந்ததையடுத்து, இவா் மீண்டும் குடிநீா் திறக்கும் பணிக்கு மாற்றப்பட்டாா்.

இந்தப் பணி மாற்றத்துக்கு மாநகராட்சி நகரமைப்பு மேற்பாா்வைாளா் முத்துராஜ்தான் காரணம் என கருதிய முத்துவேல்பாண்டியன், அரிவாளுடன் மாநகராட்சி அலுவலகத்துக்கு வந்து, முத்துராஜ்-க்கு கொலை மிரட்டல் விடுத்தாா். இதையடுத்து முத்துவேல்பாண்டியனையும் ஆணையா் பணியிடை நீக்கம் செய்தாா். மேலும் சிவகாசி நகா் போலீஸாா் வழக்குப் பதிவு செய்து முத்துவேல்பாண்டியனை கைது செய்தனா்.