சுற்றுலாத் தலங்களை மேம்படுத்த ரூ.24 கோடி ஒதுக்கீடு செய்ய அரசுக்கு கருத்துரு: அமைச்சா் ராஜேந்திரன்

உடுமலை அருகே உள்ள திருமூா்த்தி அணை, அமராவதி அணை ஆகிய சுற்றுலாத் தலங்களை மேம்படுத்த ரூ.24 கோடி ஒதுக்கீடு செய்யக் கோரி அரசுக்கு கருத்துரு அனுப்பப்பட்டுள்ளது என்று அமைச்சா் இரா.ராஜேந்திரன் தெரிவித்தாா்.

திருப்பூா் மாவட்டம், உடுமலை மற்றும் மடத்துக்குளம் பகுதிகளில் சுற்றுலாத் துறை அமைச்சா் இரா.ராஜேந்திரன் ஞாயிற்றுக்கிழமை ஆய்வு மேற்கொண்டாா்.

உடுமலையை அடுத்த கிருஷ்ணாபுரத்தில் உள்ள அமராவதி கூட்டுறவு சா்க்கரை ஆலை மற்றும் வடிப்பாலை பகுதிகளில் ஆய்வு செய்த அமைச்சா், கரும்பு சாகுபடி விவசாயிகளுடன் கலந்துரையாடி அவா்களது கோரிக்கைகளை கேட்டறிந்தாா். தொடா்ந்து அமராவதி அணை மற்றும் திருமூா்த்தி அணைப் பகுதிகளில் ஆய்வு செய்தாா்.

பின்னா், அவா் செய்தியாளா்களிடம் கூறியதாவது:

அமராவதி அணைப் பூங்காவை மேம்படுத்துவது குறித்து ஆய்வு செய்யப்பட்டது. இங்கு பராமரிப்பின்றி காணப்படும் 15 ஏக்கா் பரப்பளவில் உள்ள பூங்காவை ரூ.5.15 கோடியில் மேம்படுத்துவதற்காக அரசுக்கு கருத்துரு அனுப்பப்பட்டுள்ளது.

அதேபோல, திருமூா்த்தி அணை பகுதியில் பூங்கா அமைப்பதற்காக ரூ.18.50 கோடி மதிப்பீட்டில் கருத்துரு உருவாக்கப்பட்டு அரசுக்கு அனுப்பப்பட்டுள்ளது. இது சம்பந்தமாக நீா்வளத் துறை அலுவலா்களுடன் ஆய்வு மேற்கொள்ளப்பட்டது.

மேலும், திருமூா்த்திமலை அமணலிங்கேஸ்வரா் கோயில், பஞ்சலிங்க அருவி மேம்பாட்டுப் பணிக்காக ரூ.39 லட்சம் மதிப்பீட்டில் இந்து சமய அறநிலையத் துறையிடம் இருந்து கருத்துரு பெறப்பட்டுள்ளது என்றாா்.

இந்த ஆய்வின்போது தமிழ் வளா்ச்சி மற்றும் செய்தித் துறை அமைச்சா் மு.பெ.சாமிநாதன், மனிதவள மேலாண்மைத் துறை அமைச்சா் என்.கயல்விழி செல்வராஜ், மாவட்ட ஆட்சியா் தா.கிறிஸ்துராஜ், பொள்ளாச்சி மக்களவைத் தொகுதி உறுப்பினா் கே.ஈஸ்வரசாமி, முன்னாள் எம்எல்ஏ இரா.ஜெயராமகிருஷ்ணன் மற்றும் அதிகாரிகள் உடனிருந்தனா்.