செங்கோட்டை நகராட்சி குப்பை கிடங்கில் எம்எல்ஏ ஆய்வு

செங்கோட்டை நகராட்சி குப்பை கிடங்கில் பிற நகராட்சி, பேரூராட்சி பகுதிகளை சோ்ந்த குப்பைகளை கொட்டுவதாக வந்த தகவலையடுத்து செ.கிருஷ்ணமுரளி எம்எல்ஏ நேரில் சென்று ஆய்வு மேற்கொண்டாா்.

செங்கோட்டை நகராட்சிக்கு சொந்தமான குப்பை கிடங்கில் நகராட்சிக்குள்பட்ட 24 வாா்டுகளில் சேகரிக்கும் குப்பைகள் கொட்டப்பட்டு தரம் பிரிக்கப்படுகிறது.

மாவட்டத்தின் பல்வேறு பகுதிகளில் சேகரிக்கப்படும் குப்பைகளை இந்த குப்பை கிடங்கில் கொட்டுவதற்காக ஏராளமான வாகனங்கள் அணிவகுத்து நின்றன. தகவலறிந்த செ.கிருஷ்ணமுரளி எம்எல்ஏ, குப்பை கிடங்கு பகுதிக்கு சென்று அங்கிருந்த அதிகாரிகளிடம் விசாரணை மேற்கொண்டாா்.

மேலும், மண்டல நகராட்சி நிா்வாக இயக்குநரிடம் தொலைபேசியில் தொடா்பு கொண்டு பேசினாா். அந்தந்தப் பகுதி குப்பைகளை,ஆங்காங்கே கொட்டுவதற்கு நடவடிக்கை எடுக்க வலியுறுத்தினாா்.

பிற பகுதிகளில் சேகரிக்கப்படும் குப்பைகளை செங்கோட்டையில் கொட்டுவதற்கு அனுமதிக்கக் கூடாது என தெரிவித்தாா். செங்கோட்டை நகர அதிமுக செயலா் கணேசன் உடனிருந்தாா்.