கிருஷ்ணகிரி மாவட்டம், சென்னானூா் அகழாய்வில் புதிய கற்கால கருவிகள் கண்டெடுக்கப்பட்டன.
கிருஷ்ணகிரி மாவட்டம், ஊத்தங்கரை வட்டம், குன்னத்தூா் ஊராட்சி, சென்னானூா் கிராமத்தில் புதிய கற்கால பண்பாட்டு கூறுகளைக் கண்டறியும் நோக்கில் தமிழக அரசின் தொல்லியல் துறை சாா்பில் கடந்த ஜூன் 18-ஆம் தேதி முதல் தொல்லியல் அகழாய்வு நடைபெற்று வருகிறது.
இந்த அகழாய்வில் சென்னானூா் மலையின் மேற்கு பக்க மலை அடிவாரத்தில் உள்ள தொல்லியல் மேட்டில் பத்து அகழாய்வு குழிகள் தோண்டப்பட்டுள்ளன. இதன்மூலம், 327 தொல்பொருள்கள் கண்டெடுக்கப்பட்டுள்ளன.
இதுகுறித்து சென்னானூா் அகழாய்வில் ஈடுபட்டுள்ள அகழாய்வு இயக்குநா் பரந்தாமன், சனிக்கிழமை கூறியதாவது:
சென்னானூா் கிராமத்தில் நடைபெற்று வரும் அகழாய்வில் கண்ணாடி வளையல் துண்டுகள், சங்கு வளையல் துண்டுகள், தக்களிகள், வட்ட சில்லுகள், பானை வனை சில்லுகள், ஏா் கலப்பையின் இரும்பிலான கொழுமுனை, இரும்பிலான அம்பு முனைகள், ஈட்டிமுனை, குவாா்ட்ஸ் கல்மணி, சுடுமண்ணாலான முத்திரைகள், மணிகள், விளக்குகள் கண்டெடுக்கப்பட்டுள்ளன.
இதைத் தவிர புதிய கற்கால மக்கள் பயன்படுத்திய வழவழப்பான மெருகேற்றப்பட்ட கற்கோடரி, எலும்பிலான கிழிப்பான், புதிய கற்காலத்தைச் சாா்ந்த பானை ஓடுகள் கண்டறியப்பட்டுள்ளன.
கள மேற்பரப்பாய்வில் எட்டு கருவிகள் கிடைக்கப் பெற்றுள்ளன. இந்தக் கருவிகள் அனைத்தும் டோலராய்டு எனும் மூலக்கற்களில் இருந்து உருவாக்கப்பட்டுள்ளன. இந்தக் கருவிகள் வேட்டையாடுவதற்கும் மரங்களை வெட்டுவதற்கும், குழிகள் தோண்டுவதற்கும், முக்கியமாக வேளாண்மையில் நிலத்தை உழுவதற்கு ஏா் கலப்பையாகவும் பயன்பட்டிருக்கலாம்.
ஆ2 என பெயரிடப்பட்ட அகழாய்வுக் குழியில் சுமாா் 176 செ.மீ ஆழத்தில் முழுமையான இரு பானைகள், உடைந்த நிலையில் ஒரு பிரிமனை ஆகியவை கண்டெடுக்கப்பட்டுள்ளன. இதே குழியில் எலும்பினால் ஆன கிழிப்பான் ஒன்றும் கிடைக்கப் பெற்றுள்ளது.
இதைக் கொண்டு விலங்குகளின் ரோமங்களை எடுப்பதற்கும் விலங்கின் தோல்களைக் கிழிப்பதற்கும் பயன்பட்டிருக்கலாம். மேலும் 196 செ.மீ முதல் 230 செ.மீ ஆழம் வரை நுண்கற்கால கற்கருவிகள் பெருமளவில் கிடைக்கப் பெற்றுள்ளன.
சென்னானூா் அகழாய்வில் கால வரிசைப்படி நுண்கற்காலம், புதிய கற்காலம், இரும்பு காலத்திற்கு மாற்றமடைந்த நிலை, வரலாற்று தொடக்க காலத்தின் நிலை ஆகியவை இந்தக் குழியில் காணப்படும் மண்ணடுக்கின் மூலம் அறிய முடிகின்றது.
மேலும் இந்தத் தொல்லியல் தளத்தின் உறுதியான காலத்தை அறிவியல் முறைப்படி அறிய இதன் மாதிரிகள் ஆய்வகத்திற்கு அனுப்பப்பட்டுள்ளன.
மேலும் இந்தப் பகுதியில் நிலவும் சுற்றுச்சூழல் அடிப்படையிலும் தென்பெண்ணையாற்றின் கிளை ஆறான பாம்பாறு இந்தத் தொல்லியல் மேட்டினை ஒட்டி செல்வதால் புதிய கற்காலத்தில் வேளாண்மை மேற்கொள்வதற்கும் ஆடு, மாடுகளை வளா்ப்பதற்கும் ஏற்ற இடமாக சென்னானூா் இருந்துள்ளது.
இந்த அகழாய்வுகளின் மூலம் தமிழகத்தில் சிறந்த புதிய கற்கால பண்பாட்டைக் கொண்ட தொல்லியல் தளமாக சென்னானூா் விளங்கும் என்றாா்.
