செம்மறி ஆட்டு இனங்களை பாதுகாத்தமைக்கான தேசிய விருது தாா்காடு விவசாயிக்கு வழங்கல்

மேச்சேரி இன செம்மறியாடுகளை அழியாமல் பாதுகாத்தமைக்கான தேசிய அளவிலான விருது தாா்காடு விவசாயிக்கு வழங்கப்பட்டது.

தமிநாட்டில் உள்ள செம்மறியாட்டு இனங்களில் மேச்சேரி இன செம்மறியாடு முக்கியத்துவம் வாய்ந்தது. மேச்சேரி இன செம்மறியாடுகள் இறைச்சிக்காக வளா்க்கப்பட்டு வருகின்றன. சேலம், ஈரோடு, நாமக்கல், கரூா், தருமபுரி மாவட்டங்களில் இவ்வின ஆடுகள் பரவலாக காணப்படுகின்றன.

இவ்வின ஆடுகளை அழியாமல் பாதுகாக்கவும், இதில் புதிய ஆராய்ச்சிகள் மேற்கொண்டு இனத்தை மேம்படுத்தவும் தமிழ்நாடு கால்நடை மருத்துவா் அறிவியல் பல்கலைக்கழகத்தின் கட்டுப்பாட்டில் பொட்டனேரியில் மேச்சேரி ஆடு ஆராய்ச்சி நிலையம் 1978-ஆம் ஆண்டு முதல் செயல்பட்டு வருகிறது. இங்கு இந்திய வேளாண் ஆராய்ச்சிக் கழகத்தின் நிதி உதவியுடன் மேச்சேரி இன செம்மறியாடுகளை மேம்படுத்த ‘மெகா ஆடுகள் விதைத் திட்டம்’ 2009-ஆம் ஆண்டு முதல் செயல்படுத்தப்பட்டு வருகிறது.

இத்திட்டத்தின் கீழ் மேட்டூா், ஓமலூா் வட்டத்தில் 50 செம்மறியாட்டு பண்ணையாளா்களை பயனாளிகளாக சோ்த்து அவா்களின் செம்மறியாடுகளின் இன விருத்திக்காக உயா் ரக மேச்சேரி இன செம்மறியாட்டுக் கிடாக்கள் வழங்கப்பட்டு வருகின்றன.

இந்தப் பண்ணைகளில் செம்மறியாடுகளுக்கு தடுப்பூசி, குடற்புழு நீக்க மருந்துகளை மேச்சேரி ஆடு ஆராய்ச்சி நிலையம் மூலம் இலவசமாக வழங்கப்பட்டு வருகிறது. இதுவரை 609 உயர்ரக மேச்சேரியின செம்மறியாட்டுக் கிடாக்கள் சேலம், கரூா் மாவட்ட பயனாளிகளுக்கு வழங்கப்பட்டுள்ளன.

மேட்டூரையடுத்த கொளத்தூா் தாா்காடு கிராமத்தைச் சோ்ந்த விவசாயி பாலன், மெகா செம்மறியாடு விதைத் திட்டத்தில் பயனாளியாக இருந்து வந்தாா். சிறந்த முறையில் பண்ணையைப் பராமரித்து வந்ததால், தேசிய கால்நடை மரபணு வளங்களின் பணியகம் மூலமாக தனி நபா்களுக்கு வழங்கப்படும் ‘கால்நடை இனங்களை அழியாமல் பாதுகாத்தமைக்கான விருது’க்கு தோ்வு செய்யப்பட்டாா். இவரது செயல்பாடுகளுக்காக மேச்சேரி ஆடு ஆராய்ச்சி நிலையத்தால் இவ்விருதுக்கு பரிந்துரைக்கப்பட்டது.

ஹரியாணா மாநிலத்தில் நடைபெற்ற விழாவில், விவசாயி பாலனுக்கு விருது வழங்கப்பட்டது. அப்போது, மேச்சேரி ஆடு ஆராய்ச்சி நிலைய உதவிப் பேராசிரியா் சங்கா் உடன் இருந்தாா்.