செவ்வாப்பேட்டை, வேப்பம்பட்டு ரயில்வே மேம்பாலப் பணிகளை விரைந்து முடிக்க அறிவுறுத்தல்

திருவள்ளூா் அருகே செவ்வாப்பேட்டை மற்றும் வேப்பம்பட்டு ஆகிய பகுதிகளில் ரயில்வே மேம்பாலப் பணிகள், போந்தவாக்கம் - ஊத்துக்கோட்டை மேம்பாலம் வரை சாலை விரிவாக்கப் பணிகளைப் பாா்வையிட்டு ஆய்வு செய்த ஆட்சியா் மு.பிரதாப், அந்தப் பணிகளை விரைவில் முடிக்க அதிகாரிகளுக்கு அறிவுறுத்தினாா்.

திருவள்ளூா் மாவட்டப் பகுதிகளில் பல்வேறு வளா்ச்சித் திட்ட பணிகள் மேற்கொள்ளப்பட்டு வருகின்றன. அந்த வகையில், திருவள்ளூா் அருகே செவ்வாப்பேட்டை, வேப்பம்பட்டு ஆகிய பகுதிகளில் ரயில்வே மேம்பாலம் கடவு எண் 13, 14, 15 நடைபெற்று வருகிறது.

இந்தப் பணிகளை திருவள்ளூா் மாவட்ட ஆட்சியா் மு.பிரதாப் புதன்கிழமை பாா்வையிட்டு ஆய்வு செய்தாா். அப்போது, அங்கு பாலம் அமைப்பதற்கான தூண்கள், அந்தப் பணிகளின் முன்னேற்றம் குறித்தும் அவா் அதிகாரிகளிடம் கேட்டறிந்தாா். இதையடுத்து தனி வட்டாட்சியா் (நில எடுப்பு) அலுவலா்களிடம் விரிவுபடுத்தும் பணிக்காக நிலம் கையகப்படுத்தப்பட்ட விவரங்களையும் ஆவணங்களைக் கொண்டு அவா் ஆய்வு செய்தாா்.

இந்தப் பணிகள் நீண்ட காலமாக நடைபெற்று வருவதால், விரைவில் முடித்து பயன்பாட்டிற்கு கொண்டு வருவது தொடா்பாக அலுவலா்களுக்கு அவா் ஆலோசனைகளை வழங்கினாா்.

தொடா்ந்து நெடுஞ்சாலை (கட்டுமானம்) மற்றும் பராமரிப்புத் துறை சாா்பில் ரூ.17.50 கோடியில் போந்தவாக்கம் - ஊத்துக்கோட்டை மேம்பாலம் வரை (2.6 கி.மீ.) சாலை விரிவாக்கம் பணிகள் மேற்கொள்ளப்பட்டு வருகின்றன.

இந்தப் பணிகளையும் ஆட்சியா் பாா்வையிட்டு ஆய்வு செய்தாா். சாலைப் பணி, தரமாக மேற்கொள்ள வேண்டும் என அதிகாரிகளுக்கு அறிவுரை வழங்கினாா். பணிகளை விரைவில் முடித்து பொதுமக்கள் பயன்பாட்டுக்கு கொண்டு வரவேண்டும் என அவா் அறிவுறுத்தினாா்.

தொடா்ந்து அந்தப் பகுதியில் உள்ள கச்சூா் மேம்படுத்தப்பட்ட அரசு ஆரம்ப சுகாதார நிலையத்திற்குச் சென்றாா். அங்கு வருகைப் பதிவேடு, மருத்துவா்களின் எண்ணிக்கை, மருத்துவப் பணிகள், நோயாளிகளுக்கு வழங்கப்படும் சிகிச்சை முறைகள், மருந்து-மாத்திரை இருப்பு விவரங்கள் குறித்து விவரமாகக் கேட்டறிந்தாா்.

ஆய்வின்போது, நெடுஞ்சாலைத் துறை திருவள்ளுா் உதவிக் கோட்டப் பொறியாளா் தஸ்நேவிஸ் பா்னாண்டோ, தனி வட்டாட்சியா் (நில எடுப்பு) ப்ரீத்தி மற்றும் அரசு அலுவலா்கள் உள்ளிட்டோா் உடனிருந்தனா்.