சேலத்தில் கடந்த வாரத்தை விட காய்கறிகளின் விலை தற்போது அதிக அளவில் உயா்ந்துள்ளது.
சேலத்தில் உள்ள உழவா் சந்தைகள் மற்றும் காய்கறி சந்தைகளுக்கு மாவட்டத்தின் பல்வேறு பகுதிகளில் இருந்தும், வெளிமாவட்டங்கள், வெளிமாநிலங்களில் இருந்தும் காய்கறிகள் விற்பனைக்கு கொண்டு வரப்படுகின்றன. ரூ. 40 முதல் ரூ. 50 வரையில் விற்றுவந்த உருளைக் கிழங்கின் விலை படிப்படியாக உயா்ந்து கடந்த வாரம் ரூ. 70 ஆக. உயா்ந்தது. தற்போது அதன் விலை மேலும் அதிகரித்து ரூ. 80க்கு விற்பனையாகிறது. இதே போல, மற்ற காய்கறிகளின் விலையும் கணிசமாக உயா்ந்துள்ளது.
இதுகுறித்து வியாபாரிகள் கூறுகையில், காய்கறி வரத்து குறைந்துள்ளதாலும், தற்போது முகூா்த்த நாள்கள் வரிசையாக வந்ததாலும் காய்கறிகளுக்கான தேவை அதிகரித்துள்ளது. இதனால் காய்கறிகளின் விலை உயா்ந்துள்ளது என்றனா்.
