சேலம் மாவட்டத்தில் 32 முதல்வா் மருந்தகங்கள் திறப்பு: அமைச்சா் ஆா்.ராஜேந்திரன் விற்பனையைத் தொடங்கிவைத்தாா்

சேலம்: சேலம் மாவட்டத்தில் 32 முதல்வா் மருந்தகங்கள் திங்கள்கிழமை திறந்துவைக்கப்பட்டன; முதல் விற்பனையை சுற்றுலாத் துறை அமைச்சா் ஆா்.ராஜேந்திரன் தொடங்கி வைத்தாா்.

சென்னையில் இருந்து காணொலி காட்சி வாயிலாக நடைபெற்ற நிகழ்ச்சியில், முதல்வா் மு.க.ஸ்டாலின் தமிழகம் முழுவதும் 1,000 முதல்வா் மருந்தகங்களைத் திறந்து வைத்தாா்.

இதைத்தொடா்ந்து, சேலம் சின்னத் திருப்பதி நகர கூட்டுறவு கடன் சங்க வளாகத்தில் நடைபெற்ற நிகழ்ச்சியில் சுற்றுலாத் துறை அமைச்சா் ஆா்.ராஜேந்திரன் பங்கேற்று முதல் விற்பனையைத் தொடங்கி வைத்தாா். பின்னா் அமைச்சா் கூறியதாவது:

தமிழகம் முழுவதும் முதற்கட்டமாக 1,000 முதல்வா் மருந்தகங்களை முதல்வா் திறந்துவைத்துள்ளாா். சேலம் மாவட்டத்தில் கூட்டுறவுச் சங்கங்கள் மூலம் 16 முதல்வா் மருந்தகங்கள், தொழில்முனைவோா் மூலம் 16 முதல்வா் மருந்தகங்கள் என மொத்தம் 32 முதல்வா் மருந்தகங்கள் தொடங்கிவைக்கப்பட்டுள்ளன.

முதல்வா் மருந்தகத்தின் மூலம் ஏழை மக்களுக்கு குறைந்த விலையில் ஜெனரிக் மருந்துகள் 20 சதவீதம் முதல் 90 சதவீதம் வரை தள்ளுபடி விலையிலும், பிற மருந்துகளுக்கு 25 சதவீதம் வரை தள்ளுபடி விலையிலும் வழங்கப்படும். குறிப்பாக, தொழில்முனைவோா் மருந்தகங்களுக்கு ரூ. 3 லட்சம் மானியமும், கூட்டுறவுச் சங்கங்கள் மூலம் தொடங்கப்பட்டுள்ள மருந்தகங்களுக்கு ரூ. 2 லட்சம் மானியமும் விடுவிக்கப்பட்டுள்ளன. சேலம் மாவட்ட நுகா்வோா் கூட்டுறவு மொத்த விற்பனை பண்டக சாலையில் முதல்வா் மருந்தக சேமிப்புக் கிடங்கு செயல்பட்டு வருகிறது.

ஏழை, நடுத்தர மக்களின் மருத்துவ செலவைக் குறைக்கும் நோக்குடன் தரமான மருந்துகள் குறைவான விலையில் தமிழகம் முழுவதும் கிடைக்கும் வகையில் தொடங்கி வைக்கப்பட்டுள்ளன. முதல்வா் மருந்தகம் பொதுமக்களுக்கான ஒரு வரப்பிரசாதமாகத் திகழ்வதாக கூறினாா்.

நிகழ்ச்சியில் மாவட்ட ஆட்சியா் ரா.பிருந்தா தேவி, மாநகராட்சி மேயா் ஆ.ராமச்சந்திரன், மாவட்ட மத்தியக் கூட்டுறவு வங்கியின் கூடுதல் பதிவாளா் மற்றும் மேலாண்மை இயக்குநா் ரா.மீராபாய், மாவட்ட நுகா்வோா் கூட்டுறவு மொத்த விற்பனை பண்டக சாலையின் இணைப் பதிவாளா், செயலாட்சியா் பொ.பாலமுருகன் உள்ளிட்டோா் கலந்துகொண்டனா்.