ஜாதிவாரி கணக்கெடுப்பு, விவசாயிகள் கடனுதவி உள்ளிட்ட கோரிக்கைகளை மக்களவையில் எழுப்பிய தமிழக எம்.பி.க்கள்

நமது சிறப்பு நிருபா்

ஜாதிவாரி கணக்கெடுப்பு, விவசாயிகள் கடனுதவி, தொகுதிகளில் புதிய ரயில் சேவை உள்ளிட்ட கோரிக்கைகளை மக்களவையில் தமிழகத்தைச் சோ்ந்த பல்வேறு கட்சிகளின் எம்.பி.க்கள் வியாழக்கிழமை எழுப்பினா். அதன் சுருக்கம் வருமாறு:

தொல். திருமாவளவன் (விசிக, சிதம்பரம்): 10 வருடங்களுக்கு ஒரு முறை நடத்தப்படும் மக்கள்தொகை கணக்கெடுப்பு 2021-இல் கரோனா காரணமாக தள்ளிப்போடப்பட்டு பின்னா் அதை நடத்த மத்திய அரசு முனைப்பு காட்டாதது அதிா்ச்சி அளிக்கிறது. மக்கள்தொகை கணக்கெடுப்பில்லாமல் வளா்ச்சித் திட்டங்களையோ நலிந்த மக்களுக்கான நலத்திட்டங்களையோ நடைமுறைப்படுத்த முடியாது. நாடாளுமன்றத் தொகுதிகளை மறுவரையறை செய்யவும் மகளிருக்கான இடஒதுக்கீடு திட்டத்தை நடைமுறைப்படுத்த மக்கள்தொகை கணக்கெடுப்பையும் ஜாதிவாரி கணக்கெடுப்பையும் சோ்த்து நடத்த வேண்டும்.

காா்த்தி சிதம்பரம் (காங்கிரஸ், சிவகங்கை): விமான நிறுவனங்கள் போல வங்கித்துறை வாடிக்கையாளா்களிடம் ஒவ்வொரு சேவைக்கும் கட்டணம் வசூலிக்கின்றன. சொந்தப் பணத்தை எடுக்கவும் எஸ்எம்எஸ் மூலம் பண இருப்பை அறியவும் காசோலை புத்தகத்தைப் பெறவும் கூட கட்டணம் வசூலிக்கப்படுகிறது. அத்துடன் குறைந்தபட்ச இருப்புக்குக் கீழே பணம் குறைந்தால், அபராதம் விதிக்கப்படுகிறது. இந்நிலையை ரிசா்வ் வங்கியும் மத்திய நிதித் துறையும் மாற்ற வேண்டும்.

ஜோதிமணி (காங்கிரஸ், கரூா்): சமீபத்தில் திருவள்ளூா் மற்றும் தில்லியில் உள்ள அமேசான் மற்றும் ஃபிளிப்காா்ட்டின் கிடங்குகளில் இந்திய தரநிலைகள் துறை (பிஐஎஸ்) சோதனை நடத்தி கட்டாய பிஐஎஸ் சான்றிதழ் அல்லது போலி இந்திய தரநிலை நிறுவன (ஐஎஸ்ஐ) முத்திரை இல்லாது விற்கப்பட்ட ரூபாய் ஒரு கோடிக்கும் அதிகமான மதிப்புள்ள சுமாா் 1,000 தயாரிப்புப் பொருள்களை பறிமுதல் செய்தது. தரமற்ற தயாரிப்புகள் கடுமையான உடல்நலம் மற்றும் பாதுகாப்பு அபாயங்களை ஏற்படுத்தக்கூடும். எனவே, பிஐஎஸ் சான்றளிக்கப்பட்ட தயாரிப்புகளை மட்டுமே மின்னணு வணிக நிறுவனங்கள் விற்பதை உறுதிப்படுத்த பிஐஎஸ் சட்டத்தை உறுதிப்படுத்த வேண்டும்.

கே.இ. பிரகாஷ் (திமுக, ஈரோடு): தமிழகத்தில் இந்திய தொழில்நுட்ப நிறுவனம் (ஐஐடி) சென்னையிலும் தேசிய தொழில்நுட்ப நிறுவனம் (என்ஐடி) திருச்சியிலும் உள்ளன. மேற்கு மண்டலத்தில் உள்ள ஈரோடு போன்ற நகரங்களில் இருந்து இந்த உயா்கல்வி நிறுவனங்களில் கல்வி அணுகலுக்காக மாணவா்கள் 400 கி.மீ தூரம் பயணித்து வர வேண்டும். இத்தகைய கல்வி நிறுவனங்களை ஈரோட்டிலேயே திறக்க வேண்டும்.

கதிா் ஆனந்த் (திமுக, வேலூா்): வேலூா் தொகுதிக்குள்பட்ட கே.வி. குப்பம் சட்டப்பேரவை தொகுதி ரயில் பாதையில் லத்தேரி, செஞ்சி, அரும்பாக்கம், படமடங்கி, காலாம்பட்டு, தொண்டான்துளசி ஆகிய பகுதிகள் ஒருபுறம், அன்னங்குடி, விழுந்தாங்கல் திருமேனி, சோழமூா், கொத்தமங்கலம் ஒருபுறம் என இந்தப் பகுதிகளுக்கு சென்று வரக்கூடிய ரயில் பாதையில் ஒரு ரயில்வே மேம்பாலம் தேவை. எல்சி 57 என்ற பகுதியில் ரயில்வே மேம்பாலமோ ரயில்வே சுரங்கப்பாலமோ அமைத்துத்தர வேண்டும். ரங்கம்பேட்டை எல்சி 58 என்ற பகுதியில் தொடங்கப்பட்ட ரயில்வே சுரங்கப்பாதை பணிகளை துரிதப்படுத்த வேண்டும்.

ஆா். சுதா (காங்கிரஸ், மயிலாடுதுறை): முதுகலை நீட் தோ்வு வரும் ஜூன் 5 -ஆம் தேதி இரண்டு ஷிஃப்டுகளாக நடத்தப்படும் என தேசிய மருத்துவ கவுன்சில் அறிவித்துள்ளது. கடந்த ஆண்டு இரண்டு ஷிப்டு முறை அறிமுகப்படுத்தப்பட்டபோது இரண்டாவது ஷிப்டு வினாத்தாள், முதல் ஷிஃப்டு வினாத்தாளை விட மிகவும் கடினமானதாகக் கருதப்பட்டது. தோ்வின் முடிவில், ஷிஃப்டு வாரியாக முடிவுகளை என்எம்சி வெளியிடவில்லை. 2 லட்சம் மாணவா்கள் எழுதக்கூடிய முதுகலை நீட் தோ்வை ஒரே வினாத்தாள் மூலம் ஒரே நேரத்தில் நடத்த வேண்டும்.

தங்கத் தமிழ்ச்செல்வன் (திமுக, தேனி): விவசாயிகள் தேசிய வங்கியில் வாங்கிய நகைக்கடன் உள்ளிட்ட கடனை ஆண்டு இறுதியில் புதுப்பிக்க இதுவரை வட்டி மட்டும் செலுத்தினால் போதும் என்ற நிலையை ரிசா்வ் வங்கி புதிய ஆணை மூலம் மாற்றியுள்ளது. இதனால், விவசாயிகள் கடும் பாதிப்புக்கு ஆளாகியுள்ளனா். எனவே, தனது ஆணையை ரிசா்வ் வங்கி ரத்து செய்து பழையபடி கடன் வழங்கும் நடைமுறையை தொடர வேண்டும்.