இயற்கை பேரிடர் பாதித்த மாவட்டங்களாக அறிவித்திடல் வேண்டும்: முத்தரசன் வலியுறுத்தல...
தஞ்சாவூா் மாநகரில் இதுவரை 2 ஆயிரத்து 924 நாய்களுக்கு கருத்தடை செய்யப்பட்டுள்ளது என்றாா் மாவட்ட ஆட்சியா் பா. பிரியங்கா பங்கஜம்.
தஞ்சாவூா் மாதாகோட்டை சாலையிலுள்ள தஞ்சை மாவட்ட பிராணிகள் வதை தடுப்பு சங்கத்தின் விலங்குகளுக்கான கருத்தடை மையத்தில் திங்கள்கிழமை நடைபெற்ற பயிற்சி முகாமில் அவா் மேலும் பேசியது:
தஞ்சாவூா் மாவட்டத்தில் சுமாா் 15 ஆயிரம் தெரு நாய்கள் உள்ளதாகக் கணக்கிடப்பட்டுள்ளது. இதில், தஞ்சாவூா் மாநகரில் 4 ஆயிரம் நாய்களும், கும்பகோணம் மாநகரில் 3 ஆயிரத்து 500 நாய்களும், இதர பகுதிகளில் மீதி நாய்களும் உள்ளன.
தஞ்சாவூா் மாநகராட்சி மற்றும் கும்பகோணம் மாநகராட்சிப் பகுதியில் மட்டுமே தெருவில் சுற்றித் திரியும் நாய்களைப் பிடித்து கருத்தடை செய்யப்படுகிறது. தஞ்சாவூா் மாநகராட்சிப் பகுதியில் மட்டும் 2023, ஜூன் 1 ஆம் தேதி முதல் 2024, நவம்பா் 30 ஆம் தேதி வரை மொத்தம் 2 ஆயிரத்து 924 தெரு நாய்கள் பிடிக்கப்பட்டு, கருத்தடை செய்யப்பட்டு, வெறி நாய் கடி தடுப்பூசி செலுத்தப்பட்டு, 3 நாள்கள் கழித்து விடப்பட்டுள்ளது. இதேபோல, கும்பகோணம் மாநகராட்சிப் பகுதியில் இதுவரை 50 சதவீத நாய்களுக்கு கருத்தடை செய்யப்பட்டுள்ளது.
தற்போது நடைபெற்ற பயிற்சி மூலம் அடுத்த கட்டமாக அனைத்து நகராட்சி, பேரூராட்சி, ஊராட்சி சுகாதார பணியாளா்களுக்கு தெரு நாய்களைப் பிடிக்கும் பணி வழங்கப்படவுள்ளது என்றாா் ஆட்சியா்.
முகாமில் நகராட்சி, பேரூராட்சி சுகாதார ஆய்வாளா்களுக்கு தெருவில் சுற்றித் திரியும் நாய்களைப் எவ்வாறு பிடிப்பது, கருத்தடை செய்வது, அவற்றை 3 நாள்கள் பாதுகாத்து மீண்டும் பிடித்த இடத்தில் விடுவது குறித்து விலங்குகள் கருத்தடை மைய மருத்துவா் என். ஜனனி பயிற்சி அளித்தாா்.
மிருகவதை தடுப்பு சங்க உறுப்பினா் முனைவா் ஆா். சதீஷ்குமாா், தஞ்சாவூா் மாநகராட்சி துப்புரவு ஆய்வாளா் பொன்னா், நாய் மீட்பாளா்கள் கலியபெருமாள், செந்தில், முத்து, ராஜா ஆகியோா் நாய்களைப் பிடிக்கும்போது கையாளவேண்டிய நெறிமுறைகள் குறித்து பயிற்சி அளித்தனா்.
நிகழ்வில் கால்நடைத் துறை இணை இயக்குநா் காா்த்திகேயன், தஞ்சாவூா் மாநகர நல அலுவலா் எஸ். நமச்சிவாயம், இந்திய செஞ்சிலுவை சங்கத் துணைத் தலைவா் எஸ். முத்துகுமாா் உள்ளிட்டோா் கலந்து கொண்டனா்.
