பெரம்பலூா் மாவட்டத்தைச் சோ்ந்த விவசாயிகளுக்கு ஏப். 15-ஆம் தேதி வரை அரசு பொது சேவை மையங்களில், இலவசமாக தனித்துவ அடையாள எண் பதிவு செய்யப்படுகிறது என மாவட்ட ஆட்சியா் கிரேஸ் பச்சாவ் தெரிவித்துள்ளாா்.
இதுகுறித்து அவா் புதன்கிழமை வெளியிட்ட செய்திக் குறிப்பு:
பெரம்பலூா் மாவட்டத்தில் உள்ள 96,400 விவசாயிகளில், பிரதம மந்திரி கௌரவ நிதியுதவித் திட்டத்தின் கீழ் 53,996 போ் பயனடைந்து வருகின்றனா். இதில், 36,556 விவசாயிகள் பதிவு செய்துள்ளனா். எஞ்சியுள்ள விவசாயிகள் தங்களது நில உடைமை விவரங்களை பதிவேற்றம் செய்து, விவசாயிகளுக்கான தனித்துவமான அடையாள எண் பெற வேண்டும். இதற்காக கிராம ஊராட்சி அலுவலகங்கள், கிராம நிா்வாக அலுவலா் அலுவலகங்கள், தொடக்க வேளாண்மை கூட்டுறவு கடன் சங்க அலுவலகங்கள், வேளாண்மை உதவி இயக்குநா் அலுவலகங்கள் மற்றும் தோட்டக்கலை உதவி இயக்குநா் அலுவலகங்களில் விவசாயிகளின் நில உடைமை விவரம் பதிவு செய்யப்பட்டு வருகிறது.
பெரம்பலூா் மாவட்ட விவசாயிகள் எந்த பகுதியில் இருந்தாலும், அருகிலுள்ள பொது சேவை மையங்களில் நில உடைமைகளை இலவசமாக பதிவுசெய்ய ஏற்பாடு செய்யப்பட்டுள்ளது. எனவே, தங்களது பட்டா, கூட்டு பட்டா, ஆதாா் அட்டை, கைப்பேசி எண்ணுடன் சென்று பதிவு செய்துகொள்ளலாம். மேலும், செயலி மூலம் விவசாயிகளின் நில உடைமைகள் மற்றும் இதர விவரங்களை சரிபாா்த்து, விவசாயிகளின் ஒப்புதல் பெறப்பட்ட பிறகே பதிவேற்றம் செய்யப்பட்டு அடையாள எண் வழங்கப்படும்.
பதிவு செய்து பெறப்படும் தனித்துவ அடையாள எண் மூலம் மத்திய, மாநில அரசுகளின் பயன்களை ஒற்றைச் சாளர முறையில் பெறலாம். பயிா் கடன், காப்பீடு, நிவாரணம் பெற இந்த அடையாள எண் மிகவும் முக்கியம். விவசாயிகள் நலன் சாா்ந்த திட்டங்களை செயல்படுத்தும் வேளாண்மை, தோட்டக்கலை, வேளாண் வணிகம், கால்நடை பராமரிப்பு, கூட்டுறவு, வருவாய் உள்ளிட்ட 24 துறைகளின் மானியத் திட்டங்களையும் எளிதில் பெறலாம். மேற்கண்ட துறைகளின் திட்ட பலன்களை பெறுவதற்கு, ஒவ்வொரு முறையும் விண்ணப்பித்து ஆவணங்கள் சமா்பிக்க வேண்டிய அவசியமில்லை.
எனவே, விவசாயிகள் தங்களுடைய கணினி பட்டா, ஆதாா் எண், கைப்பேசி ஆகியவற்றுடன் அருகிலுள்ள பொது சேவை மையத்தில் ஏப். 15=ஆம் தேதிக்குள் இலவசமாகப் பதிவு செய்துகொள்ளலாம்.
