தமிழகத்தில் அடுத்த 6 நாள்களுக்கு மிதமான மழை பெய்ய வாய்ப்புள்ளதாக சென்னை வானிலை ஆய்வு மையம் தெரிவித்துள்ளது.
இது குறித்து வானிலை மையம் சாா்பில் வெளியிடப்பட்ட செய்திக் குறிப்பு: குமரிக்கடலில் வளிமண்டல கீழடுக்கு சுழற்சி நிலவுகிறது. இதனால் மழைக்கு சாதகமான கடல்காற்று தமிழகம் நோக்கி வீசுவதால், செவ்வாய்க்கிழமை (ஏப்.29) முதல் மே 3 வரை தமிழகத்தில் ஓரிரு இடங்களிலும், புதுச்சேரி, காரைக்கால் பகுதிகளிலும் இடி, மின்னலுடன் கூடிய மிதமான மழைக்கு வாய்ப்புள்ளது.
சென்னையில் இன்று மழைவாய்ப்பு: இதற்கிடையே சென்னை புகா் பகுதிகளில் திங்கள்கிழமை லேசான மழை பெய்தது. ஏப்.29-ஆம் தேதியும் சென்னை மற்றும் புறநகா் பகுதிகளில் இடி, மின்னலுடன் கூடிய லேசான மழைக்கு வாய்ப்பு உள்ளது.
மழை அளவு: தமிழகத்தில் திங்கள்கிழமை காலை வரை அதிகபட்சமாக மயிலாடுதுறை மாவட்டம் கொள்ளிடத்தில் 60 மி.மீ. மழை பதிவாகியுள்ளது. மேலும் நெய்வாசல் தென்பாதி (தஞ்சாவூா்), மணமேல்குடி (புதுக்கோட்டை) - தலா 50 மி.மீ, உத்தமபாளையம் (தேனி), மஞ்சளாறு (தேனி), கழுகுமலை (தூத்துக்குடி), பேச்சிப்பாறை (கன்னியாகுமரி), அதிராமப்பட்டினம் (தஞ்சாவூா்) - தலா 40 மி.மீ. மழை பதிவானது.
4 இடங்களில் வெயில் சதம்: தமிழகத்தில் திங்கள்கிழமை பகல் நேரத்தில் அதிகபட்சமாக பரமத்திவேலூா் 102.2 டிகிரி ஃபாரன்ஹீட் மற்றும் ஈரோடு - 101.48, வேலூா் - 101.12, திருச்சி - 100.58 டிகிரி என மொத்தம் 4 இடங்களில் வெயில் சதமடித்துள்ளது.
மேலும் ஏப்.29 முதல் மே 2-ஆம் தேதி வரை தமிழகத்தில் ஒருசில இடங்களில் அதிகபட்ச வெப்பநிலை 3 டிகிரி செல்சியஸ் வரை அதிகரிக்கும் என்று அதில் தெரிவிக்கப்பட்டுள்ளது.
