தமிழக மின் கட்டமைப்பு நவீனமயத்துக்கு ரூ.3,246 கோடி: தில்லி மாநாட்டில் செந்தில் பாலாஜி வலியுறுத்தல்

நமது நிருபர்

தமிழ்நாட்டில் மின் கட்டமைப்பு நவீனமயமாக்கலுக்காக அனுப்பப்பட்டுள்ள ரூ.3,246 கோடி திட்ட கருத்துருக்கு மத்திய அரசு விரைந்து ஒப்புதல் அளிக்க வேண்டும் என்று தில்லியில் நடைபெற்ற மாநில எரிசக்தித் துறை அமைச்சர்கள் மாநாட்டில் தமிழக மின் துறை அமைச்சர் வி.செந்தில்பாலாஜி வலியுறுத்தினார்.

மத்திய அரசின் மின்சாரம், வீட்டு வசதி மற்றும் நகர்ப்புற விவகாரங்கள் துறை அமைச்சர் மனோகர் லால் கட்டர் தலைமையில் நடைபெற்ற இம்மாநாட்டில் தமிழக மின்சாரம், மதுவிலக்கு மற்றும் ஆயத்தீர்வைத் துறை அமைச்சர் வி.செந்தில்பாலாஜி கலந்து கொண்டு பேசியதாவது:

கடந்த மூன்று ஆண்டுகளில், தமிழ்நாடு மின் உற்பத்தி மற்றும் பகிர்மானக் கழகத்திற்கு இழப்பீட்டுத் தொகையாக சுமார் ரூ.37 ஆயிரம் கோடியை தமிழ்நாடு அரசு ஒதுக்கியுள்ளது. மின் துறை நிதிச் சவால்களை கொண்டிருந்த போதிலும், தமிழ்நாட்டு மக்களுக்குத் தரமான மின்சாரத்தைக் குறைந்த விலையில் விநியோகம் செய்ய வேண்டுமென்ற மாநில அரசின் உறுதிப்பாட்டை இது எடுத்துக்காட்டுகிறது.

மின்சாரத்தின் சராசரி விற்பனை விலைக்கும் சராசரி பெறப்படும் விலைக்கும் இடையே உள்ள இடைவெளி, இந்த ஆண்டிற்கு ரூ. 0.49 என மதிப்பிடப்பட்டுள்ளது. இது முந்தைய ஆண்டின் ரூ. 1.24 என்ற அளவில் இருந்து குறைந்துள்ளது. தமிழ்நாடு மின் உற்பத்தி மற்றும் பகிர்மானக் கழகத்தின் ஆண்டு வட்டிச் சுமை சுமார் ரூ. 16,000 கோடியாக இருந்த நிலையில், தமிழ்நாடு அரசின் தொடர் முயற்சிகள் மற்றும் சீர்திருத்த நடவடிக்கைகளின் காரணமாக, ஆண்டு வட்டி விகிதம் 10.5 சதவீதம் அளவிற்குக் கொண்டு வரப்பட்டுள்ளது.

மாநில மின் நிறுவனங்களின் நிதி மற்றும் செயல்பாட்டுத் திறனை மேம்படுத்துவதில் தமிழ்நாடு காட்டியுள்ள அர்ப்பணிப்பைக் கருத்தில் கொண்டு, மத்திய அரசின் நிதி நிறுவனங்களான ஆர்இசி மற்றும் பிஎஃப்சிஆகியவற்றின் வட்டி விகிதங்களை 8 சதவீதமாகக் குறைக்க வேண்டும்.

புதிய துணை மின் நிலையங்களை நிறுவுதல் மற்றும் மேம்பாட்டுப் பணிகள் உள்பட மின் கட்டமைப்பு நவீனமயமாக்கலுக்காக ரூ.3,246 கோடி மதிப்பிலான திட்ட கருத்துரு மத்திய அரசின் மின்சார அமைச்சகத்திற்கு அனுப்பப்பட்டுள்ளது. மாநிலத்தின் வேகமான பொருளாதார வளர்ச்சி மற்றும் அதிகரித்து வரும் மின் தேவைகளுக்கேற்ப விநியோக அமைப்பை வலுப்படுத்த இந்தக் கருத்துரு மீது விரைவாக ஒப்புதல் வழங்க வேண்டும்.

புதுப்பிக்கத்தக்க எரிசக்தியில் இந்தியாவில் 3-ஆவது இடத்தில் தமிழகம் உள்ளது என்றார் அமைச்சர் வி.செந்தில்பாலாஜி.

முன்னதாக, மத்திய அமைச்சர் மனோகர் லால் கட்டரிடம் தமிழகம் தொடர்புடைய பல்வேறு கோரிக்கைகள் அடங்கிய மனுவையும் அமைச்சர் செந்தில்பாலாஜி அளித்தார்.