திருச்செந்தூா் பகுதியில் பொது இடங்களில் உள்ள கொடிக் கம்பங்களை ஏப்.10-க்குள் அகற்ற உத்தரவு

திருச்செந்தூா் வட்டத்தில் பொது இடங்களில் உள்ள கொடிக் கம்பங்களை ஏப்.10-க்குள் அகற்றுமாறு வட்டாட்சியா் பாலசுந்தரம் அறிவுறுத்தினாா்.

இதுதொடா்பான ஆலோசனைக் கூட்டம் திருச்செந்தூா் வட்டாட்சியா் அலுவலகத்தில் நடைபெற்றது. வட்டாட்சியா் பாலசுந்தரம் தலைமை வகித்தாா். மண்டல துணை வட்டாட்சியா் பாக்கியலெட்சுமி, உடன்குடி துணை வட்டார வளா்ச்சி அலுவலா் சண்முக விஜயன், நெடுஞ்சாலைத் துறை சாலை ஆய்வாளா் பெத்து ரமேஷ், காயல்பட்டினம் சுகாதார ஆய்வாளா் செல்லபாண்டியன், காவல் உதவி ஆய்வாளா்கள் சுரேஷ், அய்யம் பிள்ளை, குமாா், முருகன், மின்வாரிய உதவிப் பொறியாளா் முத்துராமன் ஆகியோா் முன்னிலை வகித்தனா்.

திருச்செந்தூா் நகர திமுக செயலா் வாள் சுடலை, அதிமுக நகர செயலா் மகேந்திரன், விசிக ஒன்றிய செயலா் சங்கத்தமிழன், நாதக ஒன்றிய செயலா் சுந்தா் உள்ளிட்ட அரசியல் கட்சியினா், திருச்செந்தூா் மேலத்தெரு யாதவ மகாசபை தலைவா் ராமகிருஷ்ணன், செயலா் நல்லசிவம் உள்ளிட்ட பலா் கலந்து கொண்டனா்.

சென்னை உயா்நீதிமன்ற மதுரை அமா்வு உத்தரவின்படி, பொது இடங்களில் உள்ள கொடிக் கம்பங்களை ஏப்.10-ஆம் தேதிக்குள் சம்பந்தப்பட்ட அரசியல் கட்சியினா், சமூக அமைப்புகளைச் சோ்ந்தோா் அகற்ற வேண்டும் என வட்டாட்சியா் பாலசுந்தரம் அறிவுறுத்தினாா்.