அவிநாசி: திருப்பூரில் நடைபெற்ற பொங்கல் விழாவில் கலைஞா்களுக்கு அமைச்சா்கள் மு.பெ.சாமிநாதன், என்.கயல்விழி செல்வராஜ் ஆகியோா் பாராட்டு தெரிவித்தனா்.
திருப்பூா் மாவட்ட நிா்வாகம், மாநகராட்சி மற்றும் நொய்யல் பண்பாட்டு அமைப்பு சாா்பில் பொங்கல் திருவிழா நடைபெற்றது.
இந்த விழாவுக்கு மாவட்ட ஆட்சியா் தா.கிறிஸ்துராஜ் தலைமை வகித்தாா். தெற்கு சட்டப் பேரவை உறுப்பினா் க.செல்வராஜ், 4-ஆவது மண்டலத் தலைவா் இல.பத்மநாபன் ஆகியோா் முன்னிலை வகித்தனா்.
தமிழ் வளா்ச்சி மற்றும் செய்தித் துறை அமைச்சா் மு.பெ. சாமிநாதன், மனிதவள மேலாண்மைத் துறை அமைச்சா் என்.கயல்விழி செல்வராஜ் ஆகியோா் பங்கேற்று, பத்மஸ்ரீ விருது பெற்ற கும்மி நடன பயிற்றுநா் பத்ரப்பனுக்கு பாராட்டுத் தெரிவித்தனா். மேலும், தமிழக அரசின் கலைமாமணி விருதுபெற்ற கலைஞா்களுக்கு நினைவுப் பரிசுகளை வழங்கினா்.
இதைத் தொடா்ந்து, அமைச்சா் மு.பெ. சாமிநாதன் பேசியதாவது: தமிழகத்தில் பழையதை கழித்து புதியதை வரவேற்கும் வகையில் போகியும், இயற்கைக்கு நன்றி தெரிவித்து சூரியனுக்கு பொங்கல் வைக்கின்ற தைத் திருநாளாக பொங்கலும், உழவா்களுக்கு உறுதுணையாக இருக்கக்கூடிய காலம் முழுவதும் உழைக்கும் கால்நடைகளை சிறப்பிக்கக்கூடிய வகையில் மாட்டுப் பொங்கலும், அதனைத் தொடா்ந்து காணும் பொங்கல் என பொங்கல் விழா தமிழா்களால் கோலாகலமாக கொண்டாடப்பட்டு வருகிறது.
பொங்கல் விழாவில் மக்களை மகிழ்விக்கும் வகையில் தமிழக அரசின் சாா்பில் பல்வேறு நிகழ்ச்சிகள் நடத்தப்பட்டு வருகின்றன. தமிழா்கள் இசையோடு பின்னிப்பிணைந்தவா்கள். தமிழகத்தில் மகிழ்ச்சியான நிகழ்வுகளாக இருந்தாலும், துக்க நிகழ்வுகளாக இருந்தாலும் அதில் இசை முக்கிய இடம் பிடித்துள்ளது. அந்த அளவுக்கு தமிழா்கள் இசையை நேசிக்கக்கூடியவா்கள்.
அந்த வகையில் நாட்டுப்புற கலைஞா்களையும், இசை கலைஞா்களையும் ஊக்குவிக்கும் வகையில் தமிழக அரசு சாா்பில் விரைவில் விருதுகள் வழங்கப்படும் என்றாா்.
