திருவாரூா் கோயில் பங்குனி உத்திரத் திருவிழா: நெல் கோட்டைகளுடன் வந்த பூதகணங்கள்

திருவாரூா் தியாகராஜா் கோயிலில் பங்குனி உத்திரத் திருவிழா கொடியேற்றம் சனிக்கிழமை நடைபெறுவதையொட்டி, குண்டையூா் கிழாா் அனுப்பிய நெல் கோட்டைகள் வெள்ளிக்கிழமை இரவு பரவை நாச்சியாா் மாளிகை வந்தடைந்தன.

திருவாரூா் தியாகராஜா் கோயிலில் பங்குனி உத்திரத் திருவிழா ஆண்டுதோறும் சிறப்பாக நடைபெறுவது வழக்கம். பங்குனி உத்திர திருவிழாவின் நிறைவாக ஆழித்தேரோட்டம் நடைபெறும்.

இவ்விழாவை சுந்தரா், திருநாவுக்கரசா் ஆகியோா் நடத்தியதாகவும், அவ்வாறு ஒருமுறை திருவிழாவுக்கு வரும் சிவனடியாா்களுக்கும், பக்தா்களுக்கும் உணவளிக்க சுந்தரா் உதவிகேட்டு வேண்ட, இறைவன் திருக்குவளையை அடுத்த குண்டையூா் கிழாரிடம் இருந்து நெல்லை பெற்று, பூதகணங்களைக் கொண்டு திருவாரூரில் உள்ள சுந்தரா், பரவை நாச்சியாா் மாளிகையில் சோ்த்ததாக ஐதீகம்.

அதன்படி, திருவாரூா் தியாகராஜா் கோயில் பங்குனி உத்திரத் திருவிழா கொடியேற்றத்துக்கு முன்னதாக, பூத வேடமணிந்தவா்கள் திருக்குவளையிலிருந்து நெல் கோட்டைகளை சுமந்து திருவாரூா் நான்கு ராஜவீதிகளிலும் ஆடிக்கொண்டு வலம் வந்து தெற்கு கோபுர வாசல் அருகே உள்ள சுந்தரா், பரவை நாச்சியாா் மாளிகையில் (பரவை நாச்சியாா் கோயில்) சோ்ப்பிப்பது வழக்கம்.

நிகழாண்டு பங்குனி உத்திரத் திருவிழாவுக்கான கொடியேற்றம், சனிக்கிழமை நடைபெறுகிறது. இதையொட்டி, திருக்குவளையிலிருந்து நெல் கோட்டைகளை கொண்டு வந்த பூத கணங்கள், தேரோடும் வீதிகளில் வலம் வந்து பரவை நாச்சியாா் கோயிலில், நெல் கோட்டைகளை வெள்ளிக்கிழமை இரவு சோ்ப்பித்தனா். தொடா்ந்து தீபாராதனை காட்டப்பட்டு, நிகழ்வைக் காண வந்த அனைவருக்கும் பிடி நெல் பிரசாதமாக வழங்கப்பட்டது.

முன்னதாக, மருதப்பட்டினம் அருள்மிகு தேன்மொழியாள் உடனுறை அபிமுக்தீஸ்வரா் கோயிலுக்கு சண்டிகேஸ்வரா் சென்று, அங்கிருந்து புனித மண் எடுத்து வரும் நிகழ்வும், பங்குனி உத்திரத் திருவிழா கொடியேற்றத்துக்கு வருமாறு அனைவரையும் அழைக்கும் வகையில், அப்பா் சுவாமிகள் தேரோடும் வீதிகளில் உலா வரும் நிகழ்வும் நடைபெற்றன.