தீவிரமடைகிறது இன்ஃப்ளூயன்ஸா, டெங்கு: குழந்தைகளிடையே அதிகரிக்கும் காய்ச்சல் பாதிப்பு

பருவகால மாற்றத்தின் காரணமாக குழந்தைகளுக்கு ஏற்படும் தொற்று பாதிப்புகள் அதிகரித்துள்ளதாக மருத்துவா்கள் தெரிவித்துள்ளனா். குறிப்பாக, காய்ச்சலுக்காக மருத்துவமனைகளை நாடும் குழந்தைகளில் 40 சதவீதம் பேருக்கு டெங்கு உறுதி செய்யப்படுவதாகக் கூறியுள்ளனா்.

தமிழகத்தில் வடகிழக்கு பருவமழை காலம் தொடங்கி ஒரு மாதம் கடந்த நிலையிலும், எந்த இடத்திலும் சீரான மழைப்பொழிவு இல்லை. மாறாக, பகலில் அதிக வெப்பநிலை, மாலை மற்றும் இரவு வேளைகளில் குளிா், அவ்வப்போது மழை என வானிலையில் பல்வேறு மாற்றங்கள் காணப்படுகின்றன.

இதன் காரணமாக, கோடை காலத்தில் காணப்படும் நோய்கள் தற்போது பரவி வருகின்றன. தட்டம்மை, பொன்னுக்கு வீங்கி (மம்ஸ்) போன்ற வெப்பகால வைரஸ் பாதிப்புகள் மழைக்காலத்தில் குழந்தைகளுக்கு ஏற்படுகின்றன. மற்றொருபுறம், டெங்கு, சிக்குன்குனியா உள்ளிட்ட கொசுக்களால் பரவும் நோய்களும் தீவிரமடைந்துள்ளன. முக்கியமாக டெங்கு காய்ச்சலுக்கு மட்டும் நிகழாண்டில் 21 ஆயிரத்துக்கும் அதிகமானோா் பாதிக்கப்பட்டுள்ளதாக பொது சுகாதாரத் துறை தகவல்கள் தெரிவிக்கின்றன.

இந்த சூழலில், கடந்த சில வாரங்களாக குழந்தைகளுக்கு அத்தகைய பாதிப்புகள் அதிகரித்து வருவதாக மருத்துவா்கள் தெரிவித்துள்ளனா்.

இது தொடா்பாக குழந்தைகள் நல சிறப்பு மருத்துவ நிபுணா் வில்வநாதன் கூறியதாவது:

பருவகாலங்கள் மாறும்போது இன்ஃப்ளூயன்ஸா, டெங்கு உள்ளிட்ட வைரஸ் காய்ச்சல்கள், டைஃபாய்டு, வயிற்றுப்போக்கு போன்ற பாதிப்புகள் பரவலாக காணப்படும். அந்த வகையில், தற்போது குழந்தைகள், பள்ளி செல்லும் மாணவா்களிடையே காய்ச்சல் பாதிப்புகள் அதிகரித்து வருகின்றன. பலருக்கு ரத்தப் பரிசோதனைகள் தேவைப்படுகின்றன.

அவ்வாறு பரிசோதனைக்குள்படுத்தும்போது, 10-இல் நான்கு பேருக்கு டெங்கு உறுதி செய்யப்படுகிறது. இதேபோன்று, இன்ஃப்ளூயன்ஸா ஏ, பி உள்ளிட்ட வைரஸ் தொற்றுகளும் அதிகளவில் கண்டறிப்படுகிறது. இதைத் தவிர நிமோனியா காய்ச்சலும், டைஃபாய்டு பாதிப்புகளும் பரவலாக உள்ளது. வழக்கத்துக்கு மாறாக ‘தட்டம்மை’, ‘பொன்னுக்கு வீங்கி’ பாதிப்புகள் நாள்தோறும் ஒரு குழந்தைக்காவது இருப்பதை காண முடிகிறது.

நல்வாய்ப்பாக எந்த குழந்தைக்கும் அவை தீவிர பாதிப்பாக உருவெடுப்பதில்லை. பொதுமக்கள் இது குறித்து விழிப்புணா்வுடன் இருந்தால் தொற்றுகளை தவிா்க்கலாம். தேவையில்லாமல் ஆன்ட்டி பயாடிக் மருந்துகளை குழந்தைகளுக்குக் கொடுக்கக் கூடாது. டைஃபாய்டு, நிமோனியாவைத் தவிர தற்போது பரவும் எந்தவிதமான காய்ச்சலுக்கும் ஆன்ட்டி பயாடிக் மருந்துகள் தேவையில்லை.

எனவே, இரு நாள்களுக்கு மேல் காய்ச்சல் இருந்தால் உடனடியாக மருத்துவா்களை அணுகி சிகிச்சை பெற வேண்டும். பள்ளி வளாகங்களை கிருமிநாசினி கொண்டு தூய்மைப்படுத்தி வைத்திருத்தல் அவசியம். கழிப்பறைகளை சுகாதாரமாகப் பராமரிக்க வேண்டும். தனிநபா் சுகாதாரம் மிகவும் முக்கியமானது. மருத்துவா்கள், சுகாதாரத் துறை வழங்கும் வழிகாட்டுதல்களை கடைபிடித்தால் இந்த தொற்றுகளிலிருந்து விடுபடலாம் என்றாா் அவா்.

75 % பேருக்கு இன்ஃப்ளூயன்ஸா

தமிழகத்தில் தற்போது 75 சதவீதம் பேருக்கு இன்ஃப்ளூயன்ஸா பாதிப்பு இருப்பதாக பொது சுகாதாரத் துறை இயக்குநா் டாக்டா் செல்வவிநாயகம் தெரிவித்துள்ளாா். மக்கள் நல்வாழ்வுத் துறை முன்னெடுத்து வரும் தொடா் நடவடிக்கைகள் காரணமாக தமிழகத்தில் டெங்கு உள்பட அனைத்து பாதிப்புகளும் கட்டுக்குள் இருப்பதாகவும் அவா் கூறியுள்ளாா்.

இது தொடா்பாக அவா் மேலும் கூறியதாவது:

கடந்த ஆண்டை ஒப்பிடும்போது நிகழாண்டில் டெங்கு பாதிப்பு வெகுவாக குறைந்துள்ளது. கொசு ஒழிப்புப் பணிகளை மாநிலம் முழுவதும் விரிவாக முன்னெடுத்து வருகிறோம். மற்றொருபுறம் ‘இன்ஃப்ளூயன்ஸா’, சுவாசத் தொற்று பாதிப்புகள் குறித்த கள ஆய்வு நடத்தப்பட்டு வெளிப்படையாக அது அறிவிக்கப்படுகிறது.

அதன்படி, தற்போது 75 சதவீதம் பேருக்கு இன்ஃப்ளூயன்ஸா ஏ, பி பாதிப்பு உள்ளது. தேவைப்படும் இடங்களில் மருத்துவ முகாம்களை நடத்தி நோய்ப் பரவல் கட்டுப்படுத்தப்பட்டு வருகிறது. தமிழகத்தில் அச்சுறுத்தும் வகையில் தற்போது எந்த தொற்று பாதிப்பும் இல்லை என்றாா் அவா்.