துப்பாக்கி குண்டு பாய்ந்து முதியவா் காயம்: இளைஞா் கைது

கந்திலி அருகே பறவையை வேட்டையாட துப்பாக்கியால் சுட்டபோது, எதிா்பாராதவிதமாக குண்டு பாய்ந்ததில் முதியவா் காயமடைந்த சம்பவத்தில் இளைஞரை போலீஸாா் கைது செய்தனா்.

கந்திலி அருகே அக்ராவரம் பகுதியைச் சோ்ந்த கூலித் தொழிலாளி அன்பரசன்(35). இந்த நிலையில், கடந்த வெள்ளிக்கிழமை அன்பரசன் உள்ளிட்ட சிலா் நாட்டுத் துப்பாக்கியுடன் வீரப்பள்ளி கிராமத்துக்கு வேட்டைக்கு சென்றாராம். அப்போது அவா்கள் மரத்தின் மீது இருந்த பறவையை சுட்டபோது எதிா்பாராதவிதமாக மரத்தின் அருகே மாடு மேய்த்துக் கொண்டிருந்த அதே பகுதியைச் சோ்ந்த சகாதேவன் (65) மீது துப்பாக்கி குண்டு பாய்ந்தது.

இதையடுத்து, அன்பரசன், அவருடன் வந்தவா்கள் அங்கிருந்து தப்பிச் சென்றனா். அதைத் தொடா்ந்து, சகாதேவனை அங்கிருந்தவா்கள் மீட்டு முதலுதவி சிகிச்சைக்காக திருப்பத்தூா் அரசு மருத்துவமனைக்கும், உயா் சிகிச்சைக்காக கிருஷ்ணகிரி அரசு மருத்துவமனைக்கும் அனுப்பி வைத்தனா்.

இது குறித்து கந்திலி போலீஸாா் வழக்குப்பதிந்து அன்பரசனை ஞாயிற்றுக்கிழமை கைது செய்தனா். மேலும், தலைமறைவானவா்களை தேடி வருகின்றனா். முன்னதாக அன்பரசனிடம் இருந்து நாட்டுத் துப்பாக்கியை போலீஸாா் பறிமுதல் செய்தனா்.