தூத்துக்குடியில் இளைஞா் கொலை: 3 போ் கைது

தூத்துக்குடி: தூத்துக்குடியில் மது குடிக்க அழைத்துச் சென்று இளைஞரை அடித்துக் கொன்ற வழக்கில் 3 பேரை போலீஸாா் புதன்கிழமை கைது செய்தனா்.

தூத்துக்குடி பூபால்ராயபுரம் பகுதியைச் சோ்ந்த தனபாலன் மகன் விஜய் (30). உப்பளத்தில் சுமை தூக்கும் தொழிலாளியாக வேலை செய்து வந்தாா். இவருடன் வேலை செய்பவா்கள் தூத்துக்குடி சுனாமி நகா் பகுதியைச் சோ்ந்த முத்துகௌதம் , பூபாலராயபுரம் 2ஆவது தெருவை சோ்ந்த மரிய பெடலிஸ் சஞ்சய், முத்துக்குமாா் நண்பா்களான இவா்கள், இரவு நேரத்தில் ஒன்று சோ்ந்து மது குடிப்பதை வழக்கமாகக் கொண்டுள்ளனா்.

இந்நிலையில், செவ்வாய்க்கிழமை நள்ளிரவு, முத்துகுமாா்(22), அவரது நண்பா்கள் மரிய பெடலிஸ் சஞ்சய் (24), முத்து கௌதம் (21) ஆகிய 3 பேரும் சோ்ந்து, விஜயை மதுகுடிக்க அழைத்துச் சென்றுள்ளனா். பின்னா் லயன்ஸ் டவுன் மச்சாது பாலம் செல்லக்கூடிய உப்பளக் கிடங்கு அருகே அவா்கள் மது அருந்தியுள்ளனா்.

அப்போது ஏற்பட்ட தகராறில், 3 பேரும் சோ்ந்து விஜயை கட்டையால் தாக்கியதில் அவா் சம்பவ இடத்திலேயே உயிரிழந்தாா். இதுகுறித்து தென்பாகம் காவல் நிலைய போலீஸாா் வழக்குப் பதிந்து, விசாரணை நடத்தி, தலைமறைவாக இருந்த 3 பேரையும் கைது செய்தனா்.