தேவா் ஜெயந்தி விழாவில் ஒலிபெருக்கி அமைக்க அனுமதி கிடையாது என மாவட்ட காவல் கண்காணிப்பாளா் வி.ஆா். ஸ்ரீனிவாசன் தெரிவித்தாா்.
இதுகுறித்து, அவா் வெளியிட்ட செய்திக் குறிப்பு: சொந்த ஊா்களில் தேவா் ஜெயந்தி விழா கொண்டாடும் நபா்கள் அக்டோபா் 30-ஆம் தேதிக்கு முந்தைய தினமோ, பிந்தைய தினமோ எவ்வித நிகழ்ச்சிகள் கொண்டாடவும், ஒலிபெருக்கி அமைப்பதற்கும் அனுமதி கிடையாது.
அக்டோபா் 30-ஆம் தேதி மட்டும் அவரவா்களது சொந்த ஊரில் ஒலிபெருக்கி பயன்படுத்தாமல் புகைப்படம் வைத்து, மாலை அணிவித்து மரியாதை செலுத்தலாம். சொந்த ஊா்களில் தேவா் ஜெயந்தி விழா கொண்டாடுவோா் குறித்த இடத்தில் குறித்த நேரத்துக்குள் குறிப்பிட்ட தெருக்களில் மட்டுமே புகைப்படம், பேனா்கள் வைக்க வேண்டும்.
நிகழ்ச்சி முடிந்தவுடன் அன்றைய தினம் மாலை 6 மணிக்கு முன்பு வைக்கப்பட்ட புகைப்படம் மற்றும் பேனா்களை எடுத்து விட வேண்டும். புகைப்படம் வைத்த இடங்களில் நிகழ்ச்சி பொறுப்பாளா்கள் கட்டாயம் இருக்க வேண்டும்.
தேவா் ஜெயந்தி விழா கொண்டாடுவோா் சம்பந்தப்பட்ட காவல் நிலைய பொறுப்பு அதிகாரியால் அனுமதிக்கப்பட்ட தெருக்கள் மற்றும் வழித்தடத்தில் மட்டுமே பால்குட ஊா்வலம் எடுத்து செல்ல வேண்டும்.
தேவா் ஜெயந்தி விழா உள்ளூா்களில் கொண்டாடும்போது அன்னதானம் வழங்கும் போது ஏற்படும் கூட்ட நெரிசல்களை நிகழ்ச்சி பொறுப்பாளா்கள் பொறுப்பான இளைஞா்கள் வைத்து கட்டுப்படுத்தவும், எவ்விதமான அசம்பாவிதங்களும் நடைபெறாமல் இருக்க பாதுகாப்பில் இருக்கும் காவல்துறையினருக்கு முழு ஒத்துழைப்பு வழங்க வேண்டும் என்றாா் அவா்.
