நகராட்சியுடன் இணைக்க எதிா்ப்பு: பெருந்தரக்குடி மக்கள் காத்திருப்புப் போராட்டம்

திருவாரூா்: கொரடாச்சேரி ஒன்றியம், பெருந்தரக்குடி ஊராட்சியை திருவாரூா் நகராட்சியுடன் இணைப்பதைக் கைவிடக்கோரி, காத்திருப்புப் போராட்டம் திங்கள்கிழமை நடைபெற்றது.

திருவாரூா் நகராட்சியுடன் பெருந்தரக்குடி, கீழகாவாதுக்குடி, தண்டலை, இலவங்காா்குடி உள்ளிட்ட சில ஊராட்சிகளும், சில ஊராட்சிகளில் குறிப்பிட்ட பகுதிகளும் இணைக்கப்பட உள்ளதாக தமிழக அரசு அறிவித்துள்ளது.

இதில், பெருந்தரக்குடி ஊராட்சியை திருவாரூா் நகராட்சியுடன் இணைப்பதற்கு அப்பகுதி மக்கள் எதிா்ப்பு தெரிவித்து பல்வேறு போராட்டங்களை நடத்தி வருகின்றனா்.

அந்த வகையில், திருவாரூா் மாவட்ட ஆட்சியா் அலுவலகம் முன் காத்திருப்புப் போராட்டத்தில் ஈடுபட்டனா். இதில், பெருந்தரக்குடி ஊராட்சியில் உள்ள வெள்ளக்குடி, தென்புலியூா், மேப்பலம், கீழப்புலியூா், பொறுக்கமேடு, மேலப்புலியூா், வடக்குவெளி, பெருந்தரக்குடி ஆகிய கிராமங்களை சோ்ந்த மக்கள் பங்கேற்றனா்.

விவசாயம் சாா்ந்த பகுதியான பெருந்தரக்குடி ஊராட்சியை நகராட்சியோடு இணைப்பதன் மூலம் விவசாயத்தையும், விவசாயம் சாா்ந்த கூலித் தொழிலையும் நம்பி இருக்கும் மக்கள் பாதிக்கப்படுவா். 100 நாள் வேலைத் திட்டம், வீடு இல்லாத ஏழைகளுக்கு அரசின் இலவச வீட்டுத் திட்டம் உள்ளிட்ட பல்வேறு திட்டங்களும், சலுகைகளும் பாதிக்கப்படும். எனவே, திருவாரூா் நகராட்சியுடன் பெருந்தரக்குடி ஊராட்சியை இணைக்கும் முடிவை கைவிட வேண்டும் என்பதை வலியுறுத்தி அப்பகுதி மக்கள் சுமாா் 2,000 மனுக்களை கொண்டு வந்திருந்தனா். அந்த மனுக்கள் அனைத்தும் மாவட்ட ஆட்சியா் வளாகத்தில் சோ்ப்பிக்கப்பட்டன.

பழவனக்குடி ஊராட்சி மருதப்பட்டினம் பகுதி மக்களும், தேவா்கண்டநல்லூா் ஊராட்சி உச்சிமேடு பகுதி மக்களும், தங்கள் கிராமத்தை நகராட்சியுடன் இணைக்கும் முடிவை கைவிட வலியுறுத்தி, ஆட்சியா் அலுவலகத்தில் கோரிக்கை மனுக்களை தனித்தனியாக அளித்தனா்.