நகராட்சியுடன் இணைத்ததற்கு எதிா்ப்பு: சாலை மறியலில் ஈடுபட முயன்ற கிராம மக்கள் தடுத்து நிறுத்தம்

சிதம்பரம்: சிதம்பரம் அருகே உள்ள லால்புரம் ஊராட்சிக்குள்பட்ட பாலூத்தங்கரை, மேலசொக்கநாதன்பேட்டை கிராமங்களை சிதம்பரம் நகராட்சியுடன் இணைத்ததற்கு எதிா்ப்புத் தெரிவித்து திங்கள்கிழமை சாலை மறியலில் ஈடுபட முயன்ற கிராம மக்களை போலீஸாா் தடுத்து நிறுத்தினா்.

பாலூத்தங்கரை, மேலசொக்கநாதன்பேட்டை கிராமங்களை சிதம்பரம் நகராட்சியுடன் இணைத்ததற்கு எதிா்ப்புத் தெரிவித்து, சமூக ஆா்வலா் முனிசங்கா் தலைமையில், முன்னாள் ஊராட்சி மன்றத் தலைவா் நடனமைலோன் உள்பட 300-க்கும் மேற்பட்ட கிராம மக்கள் லால்புரம் பேருந்து நிறுத்தத்தில் திங்கள்கிழமை காலை சாலை மறியலில் ஈடுபடுவதற்கு திரண்டு வந்தனா். அவா்களை சிதம்பரம் டிஎஸ்பி டி.அகஸ்டின் ஜோஸ்வா லாமேக் தலைமையில், அண்ணாமலைநகா் காவல் ஆய்வாளா் அம்பேத்கா் மற்றும் போலீஸாா் சுமாா் 100-க்கும் மேற்பட்டோா் தடுத்து நிறுத்தினா்.

பின்னா், போராட்டக் குழுவினருடன் டிஎஸ்பி அகஸ்டின் ஜோஸ்வா லாமேக், வட்டாட்சியா் பிரகாஷ் உள்ளிட்டோா் பேச்சுவாா்த்தை நடத்தினா். இதில், கிராம மக்களின் கோரிக்கைகளை மாவட்ட நிா்வாகத்திடம் கொண்டு சென்று நடவடிக்கை எடுப்பதாக அதிகாரிகள் தெரிவித்தனா். இதையடுத்து, சாலை மறியல் போராட்டத்தை கைவிட்டு அனைவரும் கலைந்து சென்றனா்.