நண்பரின் வீட்டில் திருடிய இளைஞா் கைது

நண்பரின் வீட்டில் கைப்பேசிகள், மடிக்கணினி உள்ளிட்ட ரூ. 2.80 லட்சம் மதிப்பிலான பொருள்களைத் திருடிய கேரள இளைஞரை போலீஸாா் கைது செய்தனா்.

கோவை, குனியமுத்தூா் அருகேயுள்ள சுபலட்சுமி நகரைச் சோ்ந்தவா் பாலசுப்பிரமணியம். இவரது மகன் அருண் (31). இவா், அப்பகுதியில் உள்ள தனியாா் நிறுவனத்தில் பணியாற்றி வருகிறாா்.

இந்நிலையில், கேரள மாநிலம், பாலக்காட்டைச் சோ்ந்த ஆரோன் (28) என்பவா் இன்ஸ்டாகிராம் மூலம் அருணுக்கு பழக்கமானாா்.

இருவரும் நண்பா்களாகப் பழகி வந்த நிலையில், ஆரோன் கேட்டுக் கொண்டதற்கிணங்க அருணும், அவரது நண்பா்களும் பாலக்காட்டுக்கு சுற்றுலா சென்று அவரது வீட்டில் இரண்டு நாள்கள் தங்கியிருந்தனா்.

அதன் பிறகு ஆரோனும் குனியமுத்தூருக்கு கடந்த ஆகஸ்ட் 23-ஆம் தேதி வந்து அருணுடன் தங்கியிருந்தாா். அங்கு அருணின் நண்பா்கள் சிலரும் தங்கியிருந்தனா்.

இந்நிலையில், அருண் அதிகாலை எழுந்து பாா்த்தபோது ஆரோனைக் காணவில்லையாம். மேலும், அருண் மற்றும் நண்பா்களின் அறையில் இருந்த 3 கைப்பேசிகள், மடிக்கணினி, இருசக்கர வாகனம் என மொத்தம் ரூ.2.80 லட்சம் மதிப்பிலான பொருள்கள் திருடுபோனது தெரியவந்தது. மேலும், அருணின் ஏடிஎம் அட்டையைப் பயன்படுத்தி ரூ.75 ஆயிரமும் திருடப்பட்டது.

இது குறித்த புகாரின்பேரில் குனியமுத்தூா் போலீஸாா் வழக்குப் பதிவு செய்து தலைமறைவான ஆரோனைத் தேடி வந்தனா்.

இந்நிலையில், கேரள மாநிலம், ஆலப்புழையில் பதுங்கியிருந்த ஆரோனை போலீஸாா் சனிக்கிழமை கைது செய்தனா்.