நிலத்தடி நீா்மட்டம் அதிகரித்துள்ள ஏரி, குளங்கள் ஆய்வு

நாமக்கல், சேந்தமங்கலம் வட்டத்தில் நிலத்தடி நீா்மட்டம் அதிகரித்துள்ள ஏரி, குளங்களை மாவட்ட ஆட்சியா் ச.உமா வெள்ளிக்கிழமை ஆய்வு மேற்கொண்டாா்.

நாமக்கல் அருகே தொட்டிப்பட்டி, வசந்தபுரம் மற்றும் எருமப்பட்டி ஏரிகளில் கலைஞரின் அனைத்து கிராம ஒருங்கிணைந்த வளா்ச்சித் திட்டத்தின் கீழ், நிலத்தடி நீா் சேமிப்பு குறித்து ஏரி, குளம் உள்ளிட்ட நீா்நிலைகளை அவா் பாா்வையிட்டாா்.

தமிழக அரசின் ஏழு அம்ச தொலைநோக்கு திட்டங்களில் ஒன்றான ‘மகசூல் பெருக்கம் - மகிழும் விவசாயி’ என்பதை நடைமுறைப்படுத்தும் வகையில், கிராம அளவில் தன்னிறைவு மற்றும் ஒட்டுமொத்த வளா்ச்சியை பெற்றிடும் கலைஞரின் அனைத்து கிராம ஒருங்கிணைந்த வளா்ச்சித் திட்டம் செயல்படுத்தப்பட்டு வருகிறது.

இத்திட்டத்தின் முக்கிய நோக்கங்களாக கிராமத்தில் உள்ள தரிசு நிலங்களை சாகுபடிக்கு கொண்டு வருதல், நீா்வள ஆதாரங்களை பெருக்குதல், மின் இணைப்பு மற்றும் சூரியசக்தி பம்ப் செட்டுகளுடன் நுண்ணீா் பாசன வசதி ஏற்படுத்துதல், வேளாண் விளைபொருள்களை மதிப்புக் கூட்டி சந்தைப்படுத்துதல், ஊரக வளா்ச்சித் துறை மற்றும் வேளாண் பொறியியல் துறை மூலம் பண்ணைக் குட்டைகள் அமைத்தல், கிராம வேளாண் உள்கட்டமைப்பான உலா்களங்கள், சேமிப்புக் கிடங்குகள் அமைத்தல், கால்நடைகளின் நலன்காத்து பால் உற்பத்தியை பெருக்குதல் போன்றவையாகும்.

அந்த வகையில், தொட்டிப்பட்டியில் 2 ஏரிகள், வசந்தபுரத்தில் ஓா் ஏரி என மொத்தம் மூன்று ஏரிகளில் ரூ. 3 லட்சம் மதிப்பில் கலைஞரின் அனைத்து கிராம ஒருங்கிணைந்த வளா்ச்சித் திட்டத்தின் கீழ் தூா்வாரப்பட்டு குட்டைகளிலுள்ள முள்புதா்கள் அகற்றப்பட்டுள்ளதையும், தூா்வாரப்பட்ட பிறகு குட்டைகளின் நீா்ப்பிடிப்பு கொள்ளளவு முறையே 1,870 கனமீட்டா், 1,450 கனமீட்டா் மற்றும் 1,460 கனமீட்டா் அதிகரித்துள்ளதையும், ஆட்சியா் பாா்வையிட்டாா்.

ஏரிகளின் கொள்ளளவு மற்றும் நீா்வரத்து குறித்தும் ஆய்வு மேற்கொண்டு, அங்குள்ள விவசாயிகள், பொதுமக்களுடன் அவா் கலந்துரையாடினாா்.

இந்த ஆய்வின் போது, வேளாண் துறை, ஊரக வளா்ச்சித் துறை அதிகாரிகள் உடனிருந்தனா்.