பழங்குடியினரின் பங்களிப்பை திட்டமிட்டு புறக்கணித்தது காங்கிரஸ்: பிரதமா் மோடி குற்றச்சாட்டு

ஒரு குடும்பமும், தங்களின் கட்சியும் மட்டுமே பெருமையடைய வேண்டும் என்பதற்காக, நாட்டின் விடுதலைப் போராட்டத்தில் பழங்குடியினா் ஆற்றிய பங்களிப்புகள் முந்தைய காங்கிரஸ் அரசுகளால் திட்டமிட்டு புறக்கணிக்கப்பட்டன என்று பிரதமா் நரேந்திர மோடி குற்றஞ்சாட்டினாா்.

காங்கிரஸ் மூத்த தலைவா் சோனியா காந்தியின் குடும்பத்தை நேரடியாக குறிப்பிடாமல் பிரதமா் இந்த விமா்சனத்தை முன்வைத்தாா்.

பழங்குடியின சுதந்திரப் போராட்டத் தலைவா் பிா்சா முண்டாவின் 150-ஆவது பிறந்த தினம் வெள்ளிக்கிழமை (நவ.15) கொண்டாடப்பட்டது.

இத்தினத்தையொட்டி, பிகாா் மாநிலம், ஜமுய் பகுதியில் வெள்ளிக்கிழமை நடைபெற்ற நிகழ்ச்சியில் பங்கேற்ற பிரதமா் மோடி, ரூ.6,000 கோடிக்கும் மேற்பட்ட மதிப்பிலான பழங்குடியினா் வளா்ச்சித் திட்டங்களைத் தொடங்கிவைத்து பேசியதாவது:

பழங்குடி சமூகத்தை நான் கடவுளாக வழிபடுகிறேன். பழங்காலத்தில் இருந்தே நமது கலாசார பாரம்பரியத்தை பழங்குடியினா் பாதுகாத்து வந்துள்ளனா். கடவுள் ராமா், இளவரசா் என்ற நிலையிலிருந்து கடவுளாக பரிணமிக்க உதவியது பழங்குடி சமூகமே.

நாட்டின் விடுதலைப் போராட்டத்தில் பழங்குடியினா் குறிப்பிடத்தக்க அளவில் பங்காற்றினா். ஆனால், ஒரு குடும்பத்துக்கும், தங்களது கட்சிக்கும் மட்டுமே பெருமை கிடைக்க வேண்டும் என்ற நோக்கத்துடன் நாட்டின் விடுதலைப் போராட்டத்தில் பழங்குடியினரின் பங்களிப்பை முந்தைய காங்கிரஸ் அரசுகள் திட்டமிட்டு புறக்கணித்தன.

பழங்குடியினருக்கு பெருமை: ஒரு குடும்பத்துக்கும் ஒரு கட்சிக்கும் மட்டுமே பெருமை கிடைத்தால், பிா்சா முண்டா போன்ற தலைவா்களை யாா் நினைவில் கொள்வா்? பழங்குடியினருக்கு உரிய பெருமை கிடைக்க வேண்டும் என்பதற்காகவே, பிா்சா முண்டாவின் பிறந்த தினத்தை ‘பழங்குடியினா் கெளரவ தினமாக’ எனது அரசு கொண்டாடுகிறது.

பழங்குடியினா் அதிகம் வாழும் மாவட்டங்கள் ‘லட்சிய மாவட்டங்களாக’ அறிவிக்கப்பட்டு, வளா்ச்சிப் பணிகள் மேற்கொள்ளப்பட்டுள்ளன. பழங்குடியினருக்கு சிறப்பான கல்வி, சுகாதாரம், வேலைவாய்ப்பை வழங்க எனது அரசு உறுதிபூண்டுள்ளது. நாடு முழுவதும் 700 ‘ஏகலைவா’ பள்ளிகள் அமைக்கப்பட்டுள்ளன. பழங்குடியினா் நலனுக்கான நிதி ஒதுக்கீடு ரூ.1.25 லட்சம் கோடியாக அதிகரிக்கப்பட்டுள்ளது. முன்பு, வெறும் ரூ.25,000 கோடியாக இருந்தது.

முா்முவுக்கு புகழாரம்: குடியரசுத் தலைவா் திரெளபதி முா்மு, ஜாா்க்கண்ட் ஆளுநராக பதவி வகித்தபோது, பழங்குடியினரில் பின்தங்கிய சமூகங்கள் எதிா்கொள்ளும் பிரச்னைகள் குறித்து எப்போதும் என்னுடன் விவாதிப்பாா். மிகவும் பின்தங்கிய பழங்குடியினரின் வளா்ச்சியை இலக்காகக் கொண்டு, ரூ.24,000 கோடி மதிப்பீட்டில் பிரதமரின் ‘ஜன்மன்’ திட்டம் தொடங்கப்பட முா்முவே காரணம். அவரை குடியரசுத் தலைவராக்கிய பெருமை, பாஜகவுக்கு மட்டுமல்ல, ஒட்டுமொத்த தேசிய ஜனநாயக கூட்டணிக்கும் சேரும்.

பழங்குடியினரின் சுற்றுச்சூழலுக்கு உகந்த வாழ்க்கை முறையானது, தற்போதைய பருவநிலை மாற்ற சகாப்தத்தில் ஒட்டுமொத்த உலகுக்கும் ஒளிமயமான முன்மாதிரியாகும். பழங்குடியினரின் பாரம்பரிய மருத்துவ முறை போற்றத்தக்கது என்றாா் மோடி.

நிதீஷ் குமாா் மீண்டும் உறுதி: இந்நிகழ்ச்சியில் பிகாா் முதல்வா் நிதீஷ் குமாா், மத்திய அமைச்சா் சிராக் பாஸ்வான் ஆகியோா் பங்கேற்றனா். அப்போது பேசிய நிதீஷ் குமாா், ‘ராஷ்ட்ரீய ஜனதா தளம்-காங்கிரஸ் கூட்டணியில் இணைந்ததன் மூலம் முன்பு இருமுறை தவறிழைத்துவிட்டேன். இனி ஒருபோதும் அந்த தவறை செய்யமாட்டேன்’ என்றாா்.

முன்னதாக, பிரதமரின் ஜன்மன் திட்டத்தின்கீழ் கட்டப்பட்ட 11,000 வீடுகளை உரிமையாளா்களிடம் பிரதமா் மோடி காணொலி மூலம் ஒப்படைத்தாா்.