புதுச்சேரி: புதுவை மாநில அரசுப் பள்ளிக் குழந்தைகளுக்கு ஆங்கில பயிற்சி வகுப்புகள் திங்கள்கிழமை தொடங்கி வைக்கப்பட்டது.
புதுவை மாநிலத்தில் உள்ள 205 அரசுப் பள்ளிகளைச் சோ்ந்த சுமாா் 17 ஆயிரத்துக்கும் மேற்பட்ட குழந்தைகளுக்கு ஆங்கிலம் கற்பிக்கும் பயிற்சி வகுப்புத் திட்டம் செயல்படுத்தப்படுகிறது. இதன் தொடக்க விழா புதுச்சேரியில் உள்ள டிஐஇடி வளாகத்தில் திங்கள்கிழமை நடைபெற்றது.
நிகழ்ச்சிக்கு புதுவை மாநிலக் கல்வித் துறை செயலா் பி.பிரியதா்ஷினி தலைமை வகித்து தொடங்கி வைத்தாா். புதுச்சேரி மாவட்ட ஆட்சியா் அ.குலோத்துங்கன் சிறப்பு விருந்தினராகக் கலந்துகொண்டு ஏற்கெனவே ஆங்கில பேச்சு உள்ளிட்ட போட்டிகள் நடத்தப்பட்டதில் வென்றவா்களுக்கு பாராட்டுச் சான்றிதழ், வெற்றிக் கோப்பைகளை வழங்கி வாழ்த்தினாா்.
நிகழ்ச்சியில் மாணவ, மாணவியரின் ஆங்கில நாடகம், பேச்சு, வாசிப்புத் திறனை வெளிப்படுத்தும் கலை நிகழ்ச்சிகள் நடைபெற்றன.
இதில், ஆங்கில கற்பித்தல் பயிற்சித் திட்ட நிா்வாக அதிகாரிகள் என்.தினகா், குலசேகரன், ராமச்சந்திரன், புதுச்சேரி டயா் முதல்வா் ராமகிருஷ்ணன் உள்ளிட்டோா் கலந்துகொண்டனா்.
