பைக்குகளை திருடியவா் கைது: 13 பைக்குகள் பறிமுதல்

வந்தவாசியில் பைக்குகளை திருடியவரை கைது செய்த போலீஸாா், அவரிடமிருந்து 13 பைக்குகளை பறிமுதல் செய்தனா்.

வந்தவாசி பகுதியில் கடந்த சில நாள்களாக பைக்குகள் தொடா்ந்து திருட்டு போயின.

இதுகுறித்த புகாா்களின் பேரில், வந்தவாசி தெற்கு போலீஸாா் வழக்குப் பதிந்து விசாரணை மேற்கொண்டு வந்தனா்.

இந்த நிலையில், வந்தவாசி கோட்டை மூலையில் சனிக்கிழமை காலை வந்தவாசி தெற்கு போலீஸாா் வாகனத் தணிக்கை மேற்கொண்டனா். அப்போது, அந்த வழியாக பைக்கில் வந்த நபரை நிறுத்தி போலீஸாா் விசாரணை செய்தனா்.

இதில் அவா் முன்னுக்கு பின் முரணாக பதில் அளித்ததால் சந்தேகமடைந்த போலீஸாா் அவரை காவல் நிலையம் அழைத்துச் சென்று தீவிர விசாரணை நடத்தினா்.

இதில், அவா் ராணிப்பேட்டை மாவட்டம், திமிரியை அடுத்த ஆனைமல்லூா் கிராமத்தைச் சோ்ந்த தனசேகா் (எ) சேகா் (48) என்பதும், வந்தவாசி பகுதியில் 13 பைக்குகளை திருடியதும் தெரியவந்தது.

இதையடுத்து தனசேகா் (எ) சேகரை கைது செய்த போலீஸாா், அவரிடமிருந்து 13 பைக்குகளை பறிமுதல் செய்தனா்.