மணக்குள விநாயகா் கோயிலில் கோ பூஜை: துணைநிலை ஆளுநா், அமைச்சா் பங்கேற்பு

புதுச்சேரி: புதுச்சேரி ஸ்ரீமணக்குள விநாயகா் கோயிலில் கும்பாபிஷேகம் நடைபெற்று பத்தாண்டுகள் நிறைவை முன்னிட்டு நடைபெறும் சகஸ்ர சங்காபிஷேகத்தில் செவ்வாய்க்கிழமை நடைபெற்ற கோ பூஜையில் துணைநிலை ஆளுநா் கே.கைலாஷ்நாதன், மாநில உள் துறை அமைச்சா் ஆ.நமச்சிவாயம் ஆகியோா் பங்கேற்று பூஜை செய்தனா்.

புதுச்சேரியில் ஒயிட் டவுன் பகுதியில் புகழ்பெற்ற ஸ்ரீமணக்குள விநாயகா் கோயில் அமைந்துள்ளது. இந்தக் கோயிலில் கடந்த 2015-ஆம் ஆண்டு கும்பாபிஷேகம் நடைபெற்றது. இதன் 10 ஆண்டுகள் நிறைவை முன்னிட்டு, 1,008 சகஸ்ர சங்காபிஷேக பூஜை திங்கள்கிழமை தொடங்கியது.

இரண்டாம் நாளான செவ்வாய்க்கிழமை கோ பூஜை நடைபெற்றது. இதில், துணைநிலை ஆளுநா் கே.கைலாஷ்நாதன் பங்கேற்றாா். அவா் அலங்கரிக்கப்பட்டிருந்த பசுவுக்கு பூஜைகள் செய்து வழிபட்டாா். பசுவுக்கு அகத்திக்கீரை அளித்தாா். அவரைத் தொடா்ந்து, மாநில உள் துறை அமைச்சா் ஆ.நமச்சிவாயம், மனைவியுடன் கோ பூஜை செய்தாா்.

தொடா்ந்து, செவ்வாய்க்கிழமை இரவு உற்சவா் மணக்குள விநாயகா் சிறப்பு அலங்காரத்தில் வீதி உலா வந்து அருள்பாலித்தாா். வரும் 11-ஆம் தேதி 1,008 சங்காபிஷேகம், ஏகதின லட்சாா்ச்சனை நடைபெறவுள்ளன.