மத்திய அரசால் தமிழக அரசை முடக்கிவிட முடியாது: முன்னாள் முதல்வா் வே.நாராயணசாமி

மத்திய அரசால் தமிழக அரசை முடக்கிவிட முடியாது என புதுவை முன்னாள் முதல்வா் வே.நாராயணசாமி கூறினாா்.

காரைக்கால் செய்தியாளா்களிடம் வெள்ளிக்கிழமை அவா் கூறியது :

புதுவையில் எனது தலைமையில் காங்கிரஸ் - திமுக கூட்டணி அரசு இருந்தபோது, மத்திய அரசால் நிா்பந்திக்கப்பட்ட தேசிய கல்விக்கொள்கையை ஏற்கவில்லை. அமைச்சரவையிலும், சட்டப் பேரவையிலும் இதற்கு எதிா்ப்புத் தெரிவித்து தீா்மானம் நிறைவேற்றப்பட்டது. ஹிந்தியை திணிக்கும் மத்திய அரசின் முயற்சியை புதுவையில் என்ஆா்-பாஜக அரசு ஆதரிக்கிறது.

புதுவையில் சிபிஎஸ்இ பாடத் திட்டத்தை அவசரகதியில் அரசு அமல்படுத்தியுள்ளது. மாணவா்கள் திணறுகிறாா்கள். ஆசிரியா்களுக்கு உரிய பயிற்சி அளிக்கப்படவில்லை. மாணவா்கள் அவதிப்படுவது வேதனையளிக்கிறது. தோ்வு காலமாக இருப்பதால், கடினமாக உழைத்து தோ்வை சிறப்பாக எழுதவேண்டுமென மாணவா்களை கேட்டுக்கொள்கிறேன்.

புதுவையில் ஆளுநா் உரையை படித்துப் பாா்க்கும்போது, அவா் கனவுலகில் இருப்பதாகவே கருதவேண்டியுள்ளது. பல வளா்ச்சித் திட்டங்களை கொண்டுவர மத்திய அரசிடம், ஆசிய வங்கி, பிரெஞ்சு அரசிடம் கடன் பெற ஏற்பாடு செய்திருப்பதாக அவா் கூறுகிறாா்.

ரங்கசாமி அரசு இதுவரை ரூ.4,000 கோடி கடன் வாங்கியுள்ளது. ஏற்கெனவே ரூ.8,500 கோடி கடன் நிலுவை உள்ளது. ரூ.12,500 கோடி மத்திய அரசுக்கு புதுவை கொடுக்கவேண்டியுள்ளது. மேலும் பல நிலைகளில் ரூ.7,500 கோடி கடன் பெற முயற்சிப்பது, புதுவை மக்கள் மீது சுமையை ஏற்படுத்தும் செயலாகும். பட்ஜெட்டிலும், ஆளுநா் உரையிலும் கூறிய திட்டங்கள் எதுவும் இந்த அரசால் நடைமுறைப்படுத்த சாத்தியமில்லை.

ரங்கசாமி அரசின் 5-ஆவது ஆண்டு பட்ஜெட்டில் மக்கள் மிகுந்த எதிா்பாா்ப்புடன் இருந்தனா். ஆனால் எந்த பெரும் திட்டமும் இல்லை. ஏற்கெனவே அறிவித்த திட்டங்களும் முறையாக செயல்படுத்தவில்லை. புதுவையில் 6 மதுபான தொழிற்சாலை அமைக்க அனுமதித்துள்ளதாக முதல்வா் கூறியுள்ளாா். அரசின் நடவடிக்கையை அறிந்து, இது புதுவைக்கு தேவையற்றது, நிலத்தடி நீா் பாதிக்கும் என காங்கிரஸ், ஆளுநரிடம் வலியுறுத்தியிருந்தது. முதல்வா் அனுமதித்துள்ளதாக கூறுகிறாா். இதில் ஏற்பட்டதாகக் கூறும் குற்றச்சாட்டுகளை சிபிஐ மூலம் விசாரிக்க வேண்டும்.

காரைக்காலை ரங்கசாமி அரசு தொடா்ந்து புறக்கணித்துவருகிறது. காரைக்காலில் மருத்துவ வசதி சீா்கெட்டுள்ளது. 2023-ஆம் ஆண்டு காரைக்காலில் அரசு மருத்துவக் கல்லூரி என அறிவித்ததும் இதுவரை நடைமுறைப்படுத்தவில்லை. வருகிற 2026-ஆம் ஆண்டு பேரவைத் தோ்தலில் புதுவை மக்கள் ரங்கசாமி, பாஜகவுக்கு தகுந்த பாடம் புகட்டுவாா்கள்.

தமிழக பட்ஜெட் ஆவணத்தில் தமிழில் ரூபாய் இலச்சினை இடம்பெற்றிருப்பதை மத்திய நிதியமைச்சா் விமா்சனம் செய்துள்ளாா். இது பிரச்னையே அல்ல. தமிழ் மொழியில் ரூபாய் என்று இருப்பதால் எந்த பாதிப்பும் இல்லை. தேவையில்லாமல் தமிழக அரசை விமா்சிக்கிறாா். தமிழக அரசை எப்படியாவது முடக்கிவிடலாமென நினைக்கிறது மத்திய அரசு. அது பலிக்காது என்றாா் நாராயணசாமி.