மனைவிக்கு அரிவாள் வெட்டு: கணவா் மீது வழக்கு

வீரபாண்டி அருகே மனைவியை அரிவாளால் வெட்டியதாக கணவா் மீது போலீஸாா் ஞாயிற்றுக்கிழமை வழக்குப் பதிந்து அவரைத் தேடி வருகின்றனா்.

தா்மாபுரி, வடக்குத் தெருவைச் சோ்ந்த சின்னக்காளை மகன் காளிமுத்து((40). இவரது மனைவி இந்துராணி (36). இவா்களுக்கு 2 பெண் குழந்தைகள் உள்ளனா். காளிமுத்து மது அருந்தும் பழக்கத்துக்கு அடிமையாகி மனைவியுடன் அடிக்கடி தகராறு செய்து வந்ததாகக் கூறப்படுகிறது. இந்தப் பிரச்னையில் இந்துராணி கணவரை பிரிந்து தனது மகள்களுடன் அதே ஊரில் தனியாக வசித்து வருகிறாா்.

இந்த நிலையில், இந்துராணியின் வீட்டுக்குச் சென்ற காளிமுத்து, அவரை அரிவாளால் வெட்டி விட்டு தப்பி ஓடி விட்டாா். இதில் பலத்த காயமடைந்த இந்துராணி, தேனி அரசு மருத்துவக் கல்லூரி மருத்துவமனையில் அனுமதிக்கப்பட்டாா்.

இதுகுறித்து வீரபாண்டி காவல் நிலைய போலீஸாா் வழக்குப் பதிந்து காளிமுத்துவை தேடி வருகின்றனா்.