சிவகங்கையில் பணியின்போது மரணமடைந்த காவலா் குடும்பத்துக்கு சக காவலா்கள் சாா்பில் ரூ.24.48 லட்சம் நிதி ஞாயிற்றுக்கிழமை வழங்கப்பட்டது.
சிவகங்கை மாவட்ட குற்றப் பதிவேடு கூடத்தில் சிவகங்கை நகரைச் சோ்ந்த பி. முத்துக்கிருஷ்ணன் (37) பணியாற்றி வந்தாா். இவா் கடந்த 8.6.2024 -அன்று பணியிலிருந்தபோது மாரடைப்பால் உயிரிழந்தாா்.
இதையடுத்து, இவருடன் கடந்த 2009 -இல் காவல் துறையில் பணியில் சோ்ந்த சக காவலா்கள் ஒருங்கிணைந்து ரூ.24,48,893-ஐ நிதியாகத் திரட்டினா். இதைத் தொடா்ந்து சிவகங்கையில் உள்ள காவலா் முத்துக்கிருஷ்ணன் இல்லத்தில் ஞாயிற்றுக்கிழமை நடைபெற்ற நிகழ்வில், அவரது மனைவி, மகன், தாய் ஆகிய மூவரிடமும் திரட்டிய நிதிக்கான காசோலையை வழங்கினா்.
காவல்துறையில் 2009 -ஆம் ஆண்டு பணியில் சோ்ந்த காவலா்கள் சாா்பில் இதுவரை பணியின்போது உயிரிழந்த காவலா்கள் 30 பேரின் குடும்பங்களுக்கு நிதியுதவி வழங்கியிருப்பதாக காவலா்கள் தெரிவித்தனா்.
