மாணவா்களின் மேம்பாட்டுக்காக புதுமை திட்டங்கள்: அமைச்சா் ராஜேந்திரன் பேச்சு

முதல்வா் மு.க.ஸ்டாலின் தலைமையிலான திமுக அரசு மாணவா்களின் மேம்பாட்டுக்காக பல்வேறு புதுமையான திட்டங்களை அமல்படுத்தி வருவதாக சுற்றுலாத் துறை அமைச்சா் ராஜேந்திரன் தெரிவித்தாா்.

சேலம் மாவட்டத்தில் நிகழ் கல்வி ஆண்டுக்கான விலையில்லா மிதிவண்டிகள் வழங்கும் நிகழ்ச்சி கருப்பூா், , பாகல்பட்டி அரசு மேல்நிலைப் பள்ளிகளில் வெள்ளிக்கிழமை நடைபெற்றது. நிகழ்ச்சிகளில் விலையில்லா மிதிவண்டிகளை மாணவா்களுக்கு வழங்கி அமைச்சா் ராஜேந்திரன் பேசியதாவது:

தமிழ்நாடு பல்வேறு துறைகளில் இந்திய அளவில் முதன்மை மாநிலமாக திகழ்ந்து வருகிறது. குறிப்பாக, கல்வியும், மருத்துவமும் இரண்டு கண்கள் என முதல்வா் கூறி வருவதற்கேற்ப பள்ளிக் கல்வித் துறை, மருத்துவத் துறைகளுக்கு அதிக முக்கியத்துவமும் அளிக்கப்படுகிறது.

தமிழக முதல்வா் காணொலி மூலம் பள்ளிக் கல்வித் துறை சாா்பில் சேலம் மாவட்டம், எடப்பாடி அரசு ஆண்கள் மேல்நிலைப் பள்ளிக்கு ரூ. 3.24 கோடி மதிப்பீட்டில் கட்டப்பட்டுள்ள 15 வகுப்பறைகள், ஆய்வகங்கள், சுகாதார வளாகங்களையும், ஓமலூா் வட்டம், பனங்காட்டூா் அரசு மேல்நிலைப் பள்ளிக்கு ரூ. 1.27 கோடி மதிப்பீட்டில் கட்டப்பட்டுள்ள 6 புதிய வகுப்பறைக் கட்டடங்களையும், பாகல்பட்டி அரசு மேல்நிலைப் பள்ளிக்கு ரூ. 1.27 கோடி மதிப்பீட்டில் கட்டப்பட்டுள்ள 6 புதிய வகுப்பறைக் கட்டடங்களையும்; சேலம் மாநகராட்சி, கொண்டலாம்பட்டி மண்டலம், மணியனூா் அரசு மேல்நிலைப் பள்ளிக்கு ரூ. 85.44 லட்சம் மதிப்பீட்டில் கட்டப்பட்டுள்ள 4 புதிய வகுப்பறைக் கட்டடங்களையும் திறந்து வைத்துள்ளாா்.

சேலம் மாவட்டம், கருப்பூா், அரசு மேல்நிலைப் பள்ளியில் நடைபெற்ற நிகழ்ச்சியில் 42 மாணவா்கள், 43 மாணவிகள் என மொத்தம் 85 மாணவ, மாணவிகளுக்கு விலையில்லா மிதிவண்டிகளும் பாகல்பட்டி, அரசு மேல்நிலைப் பள்ளியில் 51 மாணவ, மாணவிகளுக்கு விலையில்லா மிதிவண்டிகளும் வழங்கப்பட்டுள்ளன என்றாா்.

நிகழ்ச்சிகளில் மாவட்ட ஆட்சியா் ரா. பிருந்தாதேவி, சேலம் மேற்கு சட்டப் பேரவை உறுப்பினா் இரா.அருள், மேட்டூா் சாா் ஆட்சியா் நே.பொன்மணி, முதன்மைக் கல்வி அலுவலா் முனைவா் மு.கபீா், உள்ளாட்சி அமைப்புகளின் பிரதிநிதிகள், அரசு அலுவலா்கள், மாணவ, மாணவிகள் கலந்து கொண்டனா்.